Алдағы жұмыстарға қаржы республикалық бюджеттен бөлінді, деп хабарлайды @Pavlodarnews.kz тілшісі.

Ағымдағы жылы Павлодар облысында қалалар мен ауылдық елді мекендерде жалпы сомасы 9,1 миллиард теңгені құрайтын 18 жоба іске қосылады. Бұл туралы Павлодар облысының энергетика және тұрғын үй-коммуналдық шаруашылығы басқармасының басшысы Ержан Иманзайыпов мәлімдеді.

Қалаларда 5,5 миллиард теңгеге 12 жоба жүзеге асырылмақ. Оның ішінде Павлодар қаласында — алты жоба, ал Екібастұз бен Ақсу қалаларында үш жобадан іске асырылуы жоспарланған.

Ауылдық елді мекендерге келсек, 3,6 миллиард теңгеге алты жоба қолға алынады. Баянауыл ауданындағы Шоманкөл, Шонай және Аймауытов ауылдарында үш жаңа жоба іске асады. Сонымен қатар, Железин ауданындағы Моисеевка, Аққулы және Тереңкөл ауданының Песчаное ауылдарында жалпы үш ауыспалы жоба қарастырылған.

– 2025 жылдың қорытындысы бойынша таза ауызсумен жүз пайыз қол жеткізу көрсеткішін жоспарлап отырмыз, – деді Ержан Иманзайыпов. – Халық саны 200-ден асатын ауылдық елді мекендерде қолданыстағы сумен жабдықтау жүйелерін жаңартуға бағытталған тоғыз әзірленген жоба бар. Осы жобаларды мемлекеттік бюджеттен қаржыландыру үшін ҚР Өнеркәсіп және құрылыс министрлігінің атына бюджеттік өтінім жолдадық.

Ақтоғай ауданында Балтасап пен Басқамыс ауылдарында, сондай-ақ Ертіс ауданындағы Сілеті және Қызылағаш ауылдарында кешенді блок-модульдердің орнына орталықтандырылған су жүйелері салынады. Сонымен қатар, тозығы жеткен су желілерін қайта жаңарту Павлодар ауданының Достық, Маралды, Розовка ауылдарында және Ертіс ауданының Ленино ауылында жүргізіледі.

Ақтоғай ауданының Ақтоғай, Қожамжар және Приреченск ауылдарында да сумен жабдықтауды жақсарту мақсатында жаңа су құбыры жүйесін тарту жобасы дайындалған.

Басқарма басшысы атап өткендей, облыс тұрғындарын таза ауызсумен қамтамасыз ету жұмыстары жергілікті басқарманың тұрақты бақылауында.