Энергетика вице-министрі Сұңғат Есімханов жұмыс сапары барысында екібастұздықтармен кездесті, деп хабарлайды @Pavlodarnews.kz тілшісі.

ҚР Энергетика министрлігінің мәліметінше, кездесу барысында Павлодар облысы электр энергиясын өндіру бойынша елімізде бірінші орында тұрғаны және Қазақстанның барлық электр энергиясы көлемінің шамамен 40 пайызын қамтамасыз ете отырып, энергетиканың флагманы болып табылатыны атап өтілді.

Ағымдағы жылы облыстың электр станцияларында бес энергоблокта, 15 қазандықта, бес турбинада күрделі жөндеу жұмыстары жоспарланған. Жөндеу науқанын бекітілген кестеге сәйкес жүргізілмек.

Өңірдің электр станцияларының белгіленген электр қуаты шамамен 8 000 МВт құрайды. Жыл басынан бері электр энергиясын өндіру көлемі 20,2 миллиард кВт сағатты құрады. Өңірде электр желілерінің ұзындығы 17 мың км-ден асады.

Екібастұз ГРЭС-1-де №1 энергия блогы қалпына келтірілуде. Бұл станцияның қуатын 4000 МВт-қа дейін арттыруға мүмкіндік береді. Жоба ағымдағы жылы аяқталады деп күтілуде.

Екібастұз ГРЭС-2-де 3 энергоблок салу жұмыстары жүргізілуде. Жобаны іске асыру станцияның қуатын 2027 жылы 1 520 МВт-қа дейін арттыруға және жобаны іске асыру құрылыс кезеңінде шамамен 1 400 жұмыс орнын және пайдалану сатысында 350-ден астам жұмыс орнын құруға мүмкіндік береді.

Бүгінгі таңда АШМ-мен бірлесіп, көктемгі дала жұмыстарына 250 мың теңге/тонна бағамен дизель отынын жеткізу бойынша мұнай өңдеу зауытына облыстарды бекіту кестесі бекітілді. Берілген өтінімдерге сәйкес ауыл шаруашылығы тауарын өндірушілерге дизель отынын тиеу жүзеге асырылады.

Кездесу барысында қала тұрғындары Екібастұз жылу электр орталығы  жөндеу жұмыстарына, газбен жабдықтауға, электр энергиясы тарифтеріне қатысты толғандыратын сұрақтар қойып, оларға толық жауап алды.

Вице-министр алдағы уақытта барлық өзекті мәселелер кезең-кезеңімен шешілетінін атап өтті.