Мұндай ақпараттық-профилактикалық науқан жыл сайын өткізіледі, деп хабарлайды @Pavlodarnews.kz тілшісі.

Оның мақсаты – аймақ тұрғындарына отбасын жоспарлау, ерлер мен әйелдердің денсаулығын сақтау және адам папилломавирусына қарсы вакцинацияның маңыздылығы туралы сұрақтарға жауап беру.

Павлодар облысы денсаулық сақтау басқармасы басшысының орынбасары Айгүл Мұқышеваның ақпараты бойынша, оның ішінде сарапшылардың қатысуымен баспасөз конференциясы, экспресс-тестілеу жоспарланған.

– Өткен жылы өңірдің үш мыңнан астам тұрғыны мамандардың кеңестері мен репродуктивті денсаулық апталығында түрлі зерттеулерден өтті, – деді Айгүл Мұқышева.

Жастар орталықтарында ашық есік күндері өтеді. Павлодарда осындай екі орталық бар – біреуі №3 емханада, екіншісі Almaz Medical Group-та және  Екібастұздағы №3 емханада.

13 мамырда АИТВ-ға жедел тестілеуден өтуге, сондай-ақ ЖИТС орталығының инфекционист дәрігерімен сөйлесуге болады.

14 мамырда аймақ тұрғындары репродуктологтың қабылдауына бара алады. 15 мамыр Ерлер денсаулығы күніне арналған. Адам папилломавирусының алдын алу аптаны аяқтайды.

Өткен жылы 17 жасқа дейінгі 30 кәмелетке толмаған бала ана атанды. 2023 жылы мұндай жас босанған әйелдер екі есе көп болған. Дәрігерлер мұны профилактикалық жұмыстармен, соның ішінде репродуктивті денсаулық апталығымен байланыстырады.