«Жылдың үздік психологі» республикалық байқауының қалалық кезеңі өтті, деп хабарлайды  @Pavlodarnews.kz тілшісі.

Іс-шараның мақсаты – шығармашылық қызметті қолдау, түрлі деңгейдегі байқауларға қатысу, жұмыс тәжірибесін зерделеу. Байқауға қатысу үшін 13 педагог-психолог  өтінім берген. Олардың екеуі – еңбек өтілі үш жылға дейін, үшеуі – үш-жеті жылға дейін, сегізі – жеті және одан да жоғары еңбек өтілі  бар ұстаздар. 

– Байқау шарттары бойынша қатысушылар авторлық бағдарламалар, бейнематериалдар, практикалық түзету сабақтарын, шеберлік сағаттарын, психологиялық тренингтер ұсынды. Авторлық түзету- дамыту бағдарламаларын, психология бойынша элективті курс бағдарламаларын таныстырды, – дейді Павлодар қаласы білім беру бөлімінің әдіскері Шолпан Нұрахметова.

Байқау қорытындысы бойынша жеті қатысушы жүлделі орындарға ие болды. Олар қараша айында республикалық байқаудың облыстық кезеңіне қатысады. 

Ш. Шөкин атындағы гимназия-мектебінің педагог-психологі Наталья Малютина, № 24 ЖОМ педагог-психологі Алмагүл Байсадуова,  № 33 ЖОМ педагог-психологі Гүлсағира Өміржанова І орын иегерлері атанды. 

Номинация иегерлері үш қатысушы болды. Олар Павлодар қаласы білім беру бөлімінің дипломдарымен және грамоталарымен марапатталды.