XXIII Сәтбаев оқуларында ең жас қатысушы өзекті мәселені қозғады, деп хабарлайды @Pavlodarnews.kz тілшісі.

Санжар Досов № 8 мектеп-лицейінің 3-ші сыныбында оқиды. Ол мұндай сайыстарға  бұған дейін де қатысып жүргенін айтады.

– Мен 4 жасымнан бастап техника құрастырумен айналысып келемін. 2-сыныптан бастап ғылыми жобаларға қатысамын. Республикалық сайыстың 2-орын иегерімін. Осы жолы суды қоқыстардан тазарту жобасын ұсынып отырмын, – дейді Санжар Досов.

Жас өрен жазғы демалыста өзен-көлдердің ластанғанына бейжай қарай алмай, осындай жоба құрастыруға бел байлағанын айтады.  

– Жалпы тек облыс бойынша емес, еліміздің көптеген өзен-көлдері ластануда. Осы мәселені көре отырып, қоқыс жинайтын робот жасап шығардым, – дейді оқушы.

Ол болашақта робототехник болуды армандайды. 

Мақсат Көлтайұлы