Ата-аналар, педагогтар, психологтар мен қауіпсіздік қызметтерінің мамандары А. Шамкенов атындағы мектеп-лицейде балалардың болашағы туралы маңызды диалогқа бірікті, деп хабарлайды @Pavlodarnews.kz тілшісі.

«Мәдениет заңнан басталады: қазіргі заманда жауапты ата-ана болу» атты форум әдеттегіден өзгеше форматта ұйымдастырылды. Келген қонақтар бірден интерактивті ортаға еніп, фойеде арнайы тақырыптық аймақтарды аралады. Мысалы, «Құқықтық навигатор» бұрышында пайдалы ақпаратқа апаратын QR-сілтемелер ұсынылса, «Пікірлер қабырғасында» ата-аналар өздерін толғандырған ойларын ашық жеткізе алды. 

«Қауіпті заттар» көрмесі де ешкімді бейжай қалдырмады. Онда көрсетілген «экспонаттар» – еріген розеткалар, ақаулы қуаттағыштар мен арзан гирляндалар ата-аналардың салғырттығы қандай салдарға әкелуі мүмкін екенін айқын көрсетті.

«Қауіпсіздік бұрышында» үрлемелі қолтықшалардың құтқару құралы емес, жай ойыншық екенін білуге болды. Мұнда сондай-ақ құтқару жилеттері, самокат тебушілерге арналған шлемдер мен тізеқаптар, терезе бекіткіштері мен құлыптарының құрылымы көрсетілді.

Ұйымдастырушылар ата-аналар қауымымен кездесуге облыстық прокуратура мен полиция департаментінің өкілдерін шақырды.

Форумды ашқан А. Шамкенов атындағы мектеп-лицейдің директоры Ирина Тұргүлдинова отбасы мен мектеп арасындағы серіктестікті нығайту балалар үшін қауіпсіз әрі қолдаушы орта қалыптастыруда маңызды екенін атап өтті. Оның айтуынша, заңға құрмет, мәдени құндылықтар мен тәрбиедегі бірлік – балалардың табысты болашағының берік негізі.

Форумның ең маңызды бөлігі – еркін форматтағы пікірталас болды. Ресми баяндамалардың орнына ата-аналарды алаңдататын мәселелер ашық талқыланды: буллинг және оның құқықтық салдары, жасөспірімдердің түнгі серуені, вандализм мен ата-аналардың жауапкершілігі, киберқауіптер.

Павлодар облыстық полиция департаменті бастығының орынбасары, полиция полковнигі Мәлік Оңғарбаевтың айтуынша, ересектердің басты міндеті – баланың қиын жағдайға түсуіне, қылмыс құрбаны болуына немесе құқық бұзушылық жолына түсуіне жол бермеу.

– Тәжірибе көрсеткендей, жасөспірімдер арасындағы құқық бұзушылықтардың көпшілігі ата-аналардың бақылауының жеткіліксіздігінен, балалардың бос уақытында айналысатын ісінің болмауынан, теріс ортаның әсерінен және баланың эмоционалдық жағдайына жеткілікті көңіл бөлінбеуінен туындайды, – деді ол. – Сондықтан отбасының рөлі ерекше. Ата-аналар баланың мінез-құлқындағы өзгерістерді, оның ортасын, қызығушылықтарын және мүмкін мәселелерін бірінші болып байқайды.

Сондықтан баланың кешкі уақытта қайда жүргенін білу, оның ортасы мен бос уақытын бақылау, мектептегі өміріне қызығушылық таныту, заң мен қоғамға құрмет қалыптастыру, сондай-ақ қажет болған жағдайда педагогтарға, психологтарға және ювеналды полиция инспекторларына жүгіну өте маңызды.

Мәлік Оңғарбаев ата-аналар мен заңды өкілдердің балаларды тәрбиелеу мен бақылау міндеттерін тиісінше орындамағаны үшін жауапкершілік бар екенін еске салды.

Ата-аналар диалогқа белсенді қатысып, сұрақтар қойып, өз алаңдаушылықтарымен бөлісті. Кездесу соңында оларға балалардың қауіпсіздігін қамтамасыз ету бойынша ұсыныстар қамтылған ақпараттық жадынамалар таратылды.

Жалпы, «Мәдениет заңнан басталады: қазіргі заманда жауапты ата-ана болу» атты ата-аналар форумына Павлодар өңірінен 50 мыңнан астам ата-ана қатысты.