Аймақтағы білім беру ұйымдарының басшылары бәсекеге қабілетті мамандардың шетел асып кетуіне алаңдамайды, деп хабарлайды @Pavlodarnews.kz.

Өткен жылдан бастап облыстағы колледждер салалық министрліктің талабы бойынша халықаралық аккредитациядан өтуді бастады.

Өңірлік коммуникация қызметінде өткен брифингте облыстық білім басқармасының басшысы Самал Айтқазина аккредитация негізінен жұмысшы мамандықтарға бағытталғанын атап өтті.

– «ERG» компаниясының қолдауымен Аксудың Жаяу Мұса атындағы жоғары көпсалалы колледжі «Электромонтаж» мамандығы бойынша халықаралық аккредитация сертификатын алды. Сондай-ақ, Ақсудың қара металлургия колледжі «Дәнекерлеу ісі» мамандығы бойынша тиісті процедуралардан өтіп жатыр. Тағы үш колледж құжат жинауды бастады, – дейді Самал Айтқазина.

Аккредитация студенттерге халықаралық тәжірибеден өтуге, модульдер бойынша білім мен тәжірибе алмасуға, сонымен қатар, шетелдік еңбек нарығында бәсекеге қабілетті болуға мүмкіндік береді.

– Сертификаттаудан бөлек, колледждер халықаралық компаниялармен серіктестік орнатуды жалғастыруда. Мәселен, Павлодар технологиялық колледжі «Тамақтандыруды ұйымдастыру» мамандығы бойынша түрік компаниясымен меморандумға қол қойды. Ал ақпараттық технологиялар колледжі Оңтүстік Корея компаниясымен ынтымақатстық көкжиегін кеңейтуді жоспарлап отыр», –  дейді спикер.

Сала өкілдерінің пікірінше, павлодарлық колледждер дипломдарының әлемдік деңгейде мойындалуы мамандардың шетелге кетуіне себеп болмайды.

Электроника және байланыс жоғары колледжінің басшысы Марат Нығметов бұл жағдайды мақтанарлық жағдай дейді.

– Біздің түлектердің халықаралық деңгейде сұранысқа ие болуы – біз үшін қуаныш. Жақында жерлесіміз, профессор Серік Мейірманов Жапониядағы Ritsumeikan Asia Pacific University жоғары оқу орнының вице-президенті болып тағайындалды. Осындай жетістіктер бізді шабыттандырады, – дейді Марат Нығметов.

Айта кетейік, қолданыстағы нормативтік қаржыландыру әдістемесіне сәйкес 2025 жылдың 1 қыркүйегінен бастап бір студентті оқытуға бөлінетін қаражат 437 мың теңгеден 912 мың теңгеге дейін ұлғайтылады. Ал халықаралық стандартқа қол жеткізілген соң бұл сома миллион теңгеден асады.

Еске салайық, облыстағы 33 колледж жұмысшы мамандықтар бойынша кадр даярлайды. Жалпы 52 бағыт қамтылған.