Аймақтағы кадр тапшылығын жоюға колледждер атсалысуда, деп хабарлайды @Pavlodarnews.kz.

Облыстық өңірлік коммуникациялар қызметінде өткен брифингте облыстық білім басқармасының басшысы Самал Айтқазина аймақтың еңбек нарығына қажет мамандықтар туралы айтты.

–  Су тасқыны аймақта маңызды проблеманы айқындады. Бізге гидротехниктер қажет. Халықпен өткен кездесулерде тұрғындар кадр тапшылығына алаңдаушылық білдірді. Ауыл тұрғындары гидротехниктер зерттеулер жүргізіп, қауіп-қатердің алдын алады деген пікірде. Ал жеңіл өнеркәсіп саласы макарон және нан-тоқаш өнімдерін дайындау мамандарын талап етеді. Біз бұл сұранысты назардан тыс қалдырмаймыз. Қазіргі уақытта жаңа мамандықтар бойынша оқыту процесін ұйымдастыру жұмыстарын жүргізіп жатырмыз, – дейді спикер.

Алайда, жаңа оқу бағыттарын енгізу үшін мұқият дайындық қажет.

–  Әр мамандық үшін лицензия алу керек. Бұл ұзақ әрі күрделі процесс. Колледжді анықтап, материалдық-техникалық базаны құру, оқу бағдарламаларын әзірлеу және педагогикалық құрамды дайындау қажет. Мамандарға қойылатын талаптар қатаң. Осы жұмыстар аяқталғаннан кейін ғана құжаттарды рәсімдеуге кірісеміз. Қазіргі уақытта қажетті құжаттарды тапсыруға дайынбыз, – дейді Самал Айтқазина.

Еске сала кетейік, өткен жылдың көктемінде Ақтоғай ауданына қарасты Жалаулы ауылының тұрғындары қарғын судан зардап шекті. 14 үй апатты деп танылып, олардың бесеуі қалпына келтіруге жарамсыз болып шықты.