Жоба өңірде алғаш рет жүзеге асырылмақ, деп хабарлайды @Pavlodarnews.kz тілшісі.

«Достық үйінде» Қазақстан халқы Ассамблеясының ұйымдастыруымен облыстың кәсіпорын өкілдерімен кездесу өтті. Онда жаз мезгілінде оқушыларды жұмыспен қамту мәселесі талқыланып, жұмыс берушілерге бағдарламаны қайта қолдауға шақыру жасалды.

– Біз 16 жылдан бері жазғы уақытта оқушыларды облыстың кәсіпорындарына жұмысқа орналастырып келеміз. Бұл жұмысты жастарды еңбек арқылы тәрбиелеудің бір түрі деп есептейміз. Еңбек — әрқашан ең жақсы тәрбие құралы, – деді қоғамдық кеңес мүшесі Владимир Берковский.

Биыл жазда 7 мен 10-сынып аралығындағы 11 мыңға жуық оқушы тәжірибеден өтті.

– Балалар өңірдің ірі кәсіпорындарында, ауруханалар мен трамвай басқармасында еңбек етті. Олар қызметкерлерге негізгі жұмыстарды орындауда көмектесті. Оқушыларға ең төменгі жалақы — 85 мың теңге төленді, ал кейбіреулерінің табысы 150 мың теңгеден асты, – деді ол.

Жоба жасөспірімдердің еңбекпен қамтылуын ғана емес, олардың адамгершілік тұрғыдан тәрбиеленуін де көздейді.

– Мысалы, жас жігіт ауыр науқасқа тамақ беріп жатқан сәтте оның санасы өзгереді. Ол өмірдің қадірін түсінеді, – деді Владимир Берковский.

Оның айтуынша, ата-аналар бұл бастаманы қолдап отыр. Бір ай еңбек еткеннен кейін балалар жауапкершілікті сезініп, тәртіпке үйренеді.

Ассамблея келер жылы да кәсіпорындарға жасөспірімдерге уақытша жұмыс орындарын құруды ұсынды. Егер өндірістік жағдай оған мүмкіндік бермесе, олар оқушылардың еңбекақысын демеушілік көмек ретінде төлей алады.

– Екінші нұсқа бар: олардың еңбегін ауруханаларда төлеуге болады. Онда оқушылар әрдайым қажет — науқастарға көмектеседі, тамақ тасиды. Ал сіздер бұл еңбекті демеушілік көмек ретінде өтей аласыздар, – деді ол.

Сонымен қатар Ассамблея алғаш рет оқушыларды оқу кезеңінде де өндірістік еңбекке тарту бастамасын көтерді.

– Көп мектептерде тігін машиналары бос тұр. Біз фабрикалармен келісім жасадық: олар мата береді, ал оқушылар қолғап пен халат тігеді. Мектеп сол өнімді сатып, оқушыларға жалақы төлейді, – деп түсіндірді ол.

Мұндай тәсіл оқушылардың еңбек дағдыларын қалыптастырып, өзіне сенімді әрі дербес болуға үйретеді.