Қадағалау органы азаматтарды тексерілмеген ақпаратты таратудан бас тартуға шақырды, деп хабарлайды @Pavlodarnews.kz тілшісі.

Қазақстан Республикасының Бас прокуратурасы әлеуметтік желілерде қоғамда алауыздық туғызуға бағытталған арандатушылық сипаттағы жарияланымдар мен пікірлердің таралуына байланысты мәлімдеме жасады.

Ведомство мұндай әрекеттерге жол берілмейтінін және олар үшін заңнамада жауапкершілік қарастырылғанын еске салды.

– Әлеуметтік желілерде алауыздықты қоздыруға бағытталған материалдарды жариялау мен тарату заңға сәйкес қатаң түрде қудаланады, – деді Бас прокуратурада.

Қылмыстық кодекстің 174-бабына сәйкес, алауыздықты қоздыру фактілері үшін екі мыңнан жеті мың айлық есептік көрсеткішке дейін айыппұл салу немесе іс-әрекеттің ауырлығына қарай екі жылдан 20 жылға дейін бас бостандығын шектеу не айыру жазасы қарастырылған.

Сонымен қатар Қазақстан заңнамасы онлайн-платформаларда құқыққа қайшы контентті орналастыруға және таратуға тыйым салады.

Егер мұндай әрекеттерде қылмыстық құқық бұзушылық белгілері болмаса, Әкімшілік құқық бұзушылық туралы кодекстің 456-2-бабының 3-1-бөлігіне сәйкес 20 АЕК көлемінде айыппұл салынады.

Бас прокуратура азаматтарды ақпараттың шынайылығын мұқият тексеруге және қоғамда алауыздық туғызуы мүмкін материалдарды жарияламауға шақырды.

Ведомство өкілдері жалған ақпарат тарату мен заңсыз контентті жариялау үшін де заңнамада жауапкершілік қарастырылғанын еске салды.