Еуропаның ең биік шыңында «Адай» күйі күмбірледі, деп хабарлайды @Pavlodarnews.kz.

5-ші Дүниежүзілік Көшпенділер ойындары Дирекциясының мәліметінше, Әлібек Қайырбек Қ.Қуанышбаев атындағы Ұлттық театрының әртісі Эльбрусты бағындырып, оның шыңында өнер көрсетті.

Қ.Қуанышбаев атындағы Ұлттық театрдың әртісі Әлібек Қайырбек Еуропа мен Ресейдің ең биік нүктесі — Эльбрустың батыс шыңына шығуға бел буды. Оның бұл өрлеуі қыркүйек айында өтетін 5-ші Дүниежүзілік Көшпенділер ойындарына арналды.

Әлібек биіктікті бағындырып қана қоймай, алдағы шараны насихаттау үшін осы бірегей мүмкіндікті пайдаланды. Эльбрус шыңында өнер көрсетіп, осы керемет тау басында өнер көрсеткен алғашқы қазақ атанды.

Оның ерлігі өнер мен спорттық жетістіктердің үйлесімділігінің жарқын үлгісіне айналды, сондай-ақ көптеген қазақстандықтарға шабыт берді. Әлібек қазақ мәдениетін халықаралық аренада дәріптеуді жалғастыруды жоспарлап отыр және оның бастамасы Көшпенділер ойындарына назар аудартып, қазақ дәстүрлерінің байлығы мен алуан түрлілігін көрсетеді деп сенім білдірді.