Жұмыскерлер кен саласына қосқан үлестері үшін марапатталды, деп хабарлайды @Pavlodarnews.kz тілшісі

Екібастұз қаласына жұмыс сапарымен барған облыс басшысы Асайын Байханов кеншілерді кәсіби мерекелерімен құттықтады.

— Сіздердің қажырлы еңбектеріңіз облысымыздың жарқын болашағына жол ашты. Осы сәтті пайдаланып, баршаңызға шынайы алғысымды білдіремін. Бүгін мен Мемлекет басшысының атынан еңбегі жоғары деңгейде танылған қызметкерлерге мемлекеттік наградалар табыстау үшін келдім. Осындай айтулы күні «Шығыс» кеніші өзінің қырық жылдығын атап отырғаны бізді айрықша қуантып отыр. Ол – қазіргі заманғы цифрлық технологиялар енгізілген Қазақстанның ірі көмір өндіруші кәсіпорындарының бірі. Кәсіпорын Павлодар облысының әлеуметтік-экономикалық дамуына елеулі үлес қосуда, — деді Асайын Байханов.

«Құрмет» медалімен марапатталғандардың ішінде «Шығыс» разрезінде жиырма жыл бойы жұмыс істеген экскаватор машинисі Ерсайын Сейфуллин бар.

— Көмір өнеркәсібі – ауыр сала. Мұнда мықты адамдар жұмыс істейді. Менің ауысымымда бес адам жұмыс істейді. Біз сағатына 2,5 тонна жөнелтуге қабілетті экскаваторды басқарамыз. Бұл – өте жауапты жұмыс. Мен – төрт баланың әкесімін, ал үлкен ұлым менің ізімді жалғастырды. Ол да экскаваторда жұмыс істейді, — деді Ерсайын Сейфуллин.

Қазір салаға оқу орындарын бітіріп, жұмысқа тұрып жатқан жастар өте көп. Бүгінгі салтанатты шараға қатысушылардың тең жартысы – жас буын өкілдері.

Ольга Кенжина «Шығыс» разрезіне колледждің төртінші курсын оқып жатқанда жұмысқа орналасты. Биыл мекемеде жұмыс істеп келе жатқанына он жыл болды. 

— Колледжді бітірген соң Павлодар Инновациялық Еуразиялық университетіне түсіп, мамандығым бойынша оқуымды жалғастырдым. Екі жылдан кейін мені теміржол вокзалының кезекшісі қызметіне ауыстырды. 2018 жылы станция бастығының орынбасары, ал 2022 жылы бастық болып тағайындалдым, — деді  Ольга Кенжина.

Сондай-ақ жұмыскерлерді «Ерен еңбегі үшін» медалімен марапаттады, кейбіреуіне пәтердің кілті табысталды.

Фото: Амина Жеңісқызы