@Pavlodarnews.kz тілшісі нағыз құтқарушы қандай болуы керек екенін анықтады.

Руслан Жұмабеков Екібастұз құтқару қызметінде бас құтқарушы болып жұмыс атқарғанына жиырма жыл болды. Ол бұл кәсіпке 26 жасында келген.

Америкалық құтқарушы 911

 – Мен бұл мамандықты арнайы таңдаған жоқпын, хабарландырудан көзім шалып қалған соң барып көрдім. Ол кезде мен америкалық 911 құтқарушылары туралы фильмдерді көріп, өзімді сынап көргім келген. Уақыт өте келе осы салада жұмыс істеуге деген қызығушылығым артты, – дейді Руслан Жұмабеков.

Кейін айналасындағы әріптестері екінші отбасына, жұмысы екінші үйіне айналған.

Ең қиын тәжірибе

– Мен үшін ең қиын сынақ – Майқайың кентіндегі автобус шахтаға құлаған оқиға. Резервтік ауысымда болып, бірінші күні жеке қатыстым. Оқиға орнына келгенде үлкен шұңқыр пайда болғанын көрдік. Сол сәтте өз өмірімізге үлкен қауіп төндіріп, барынша көмектесуге тырыстық. Сол кез естен кетпейді, – деп еске алады құтқарушы.

Оның айтуынша, құтқарушыларға күнделікті тұрмыстық жағдайларғабайланысты қоңыраулар жиі түседі.

– Адамдар көбінесе есіктерді ашуға шақырады. Кәмелетке толмағандар кейде есікті ішінен жауып, есікті өздері аша алмайды. Жалғыз тұратын қарттар үйде құлап, көмексіз тұра алмайтын жағдайлар да болады. Жол-көлік оқиғалары да жиі болады, – дейді спикер.

Руслан Жұмабеков құтқару жұмыстарына белсене қатысқаны үшін «Ерлігі үшін» медалін алған. Осыдан он шақты жыл бұрын 80-нен астам көлік қар құрсауында қалып қойғандакомандасымен бірге барлық көліктерді шығару үшін көп жұмыс істеуге мәжбүр болған. Тіпті, зардап шеккендерге психологиялық көмек көрсеткен.

Басқаларға психологиялық қолдау көрсетіп, үнемі экстремалды жағдайда жұмыс істегендіктен, құтқарушылардың өздері де психологиялық көмекке мұқтаж.

– Өз басым жаман нәрселерді ойламауға, эмоцияларымды бақылауда ұстауға тырысамын. Достармен кездесу, демалысқа бару және балық аулау жақсы көмектеседі, – дейді құтқарушы.

Сабырлылық – нағыз кәсіпқойдың қасиеті

– Бізге жақсы физикалық дайындық қажет. Күйзелісте және қауіпті жағдайларда сабырлық таныту маңызды. Әрбір секунд маңызды, сондықтан тез шешім қабылдау үшін жылдам реакция мен батылдық қажет. Ең бастысы, командамен жұмыс жасай білу керек, құтқару операциялары көбінесе басқа адамдармен келісілген әрекеттерді қажет етеді.

Күш – білімде

Құтқарушы болу – ең алдымен басқа адамдардың өміріне жауапкершілікті алу. 20 жылдық тәжірибесі бар бас құтқарушы ауысым сайын дайындықтан өтуі керек. Әрбір кезекшілік теориялық және практикалық дайындықтан басталады, бұл –авариялық-құтқару жұмыстары, медициналық, психологиялық және өрт сөндіру жаттығулары.

Екібастұздық Руслан Жұмабеков білімнің басы – бейнет, соңы –зейнет екенін айтады.

Балама үлгі болдым

– Бұл салада жүргеніме 20 жыл болғандықтан, мінезім өзгерді деп айта аламын. Мен әлдеқайда байсалды әрі жауапкершілікті сезіне бастағанымды байқадым әрі 20 жастағы ұлыма үлгі болдым, – дейді құтқарушы.

Руслан Жұмабеков құтқарушы болғысы келетін жандарға өзіне деген сенімін жоғалтпауға, батыл әрі төзімді болуға және кедергілерден қорықпауға кеңес береді.