Ұстаздың оқытудағы ерекше әдіс-тәсілдері бағаланды, деп хабарлайды @Pavlodarnews.kz.

Мұғалімдер күні мерекесіне орай Павлодар облысының бес педагогы республикалық «Ең үздік сынып жетекшісі» байқауының жеңімпаздары мен жүлдегерлері атанды. 2-3 қазан күндері өткен байқауды балалардың әл-ауқатын арттыру жөніндегі ұлттық ғылыми-практикалық «Өркен» институты ұйымдастырды. Байқау елдің үздік сынып жетекшілерін анықтауды ғана емес, сонымен қатар олардың шығармашылық көзқарасын, инновациялық әдістерін және кәсіби шеберліктерін көрсетуді мақсат етті.

Байқаудың бас жүлдесін Май ауданы Мұқашев атындағы орта мектептің ұстазы Ғаламат Жанабек жеңіп алды. Оның ерекше тәсілі мен тәрбие жұмысына деген терең қызығушылығы қазылар алқасын тәнті етті.

Бірінші орын Шарбақты ауданы Шалдай орта мектебінің мұғалімі Светлана Ибраеваға берілді. Оның көп жылдық тәжірибесі мен жаңашыл идеялары оған жоғары нәтижеге қол жеткізуге мүмкіндік берді.

Екінші орынды Павлодар қаласындағы Ш.Шөкин атындағы гимназияның мұғалімі Дәуіржан Күлжанов иеленді, ол тәрбие жұмысына заманауи тәсілдерді көрсетті.

Үшінші орынды Павлодар қаласындағы Абай атындағы дарынды балаларға арналған гимназияның ұстазы Назерке Семей және Екібастұз қаласы №36 мектеп-лицейінің мұғалімі Еркежан Совет бөлді. Екі педагог та оқушылар ұжымын қалыптастыруда шығармашылық әдістерді қолданып, тамаша нәтижелер көрсетті.

Іс-шараның басты мақсаты – сынып жетекшілерінің әлеуметтік мәртебесін арттыру және олардың шығармашылық әлеуетін ашу.