Отандық өнім көзге түсетін жерде болуы керек, деп хабарлайды @Pavlodarnews.kz тілшісі.

Қазақстан Республикасы Сауда және интеграция бірінші вице-министрі Айжан Бижанованың қатысуымен өткен кездесуде «ЭкоДом-Павлодар» ЖШС директоры Марина Рейдина отандық тауар өндірушілердің мүддесіне қатысты сауал қойды.

– Біз ұлттық тәттілер, құрт, қоспа және тағы басқаларын өндіреміз. Сөрелердегі қазақстандық өнімдердің санын көбейтуге бола ма? Ұлттық өнім үшін жекелеген орындарды ұлғайту жөніндегі мемлекеттік бағдарламаны енгізуге бола ма? – деп сұрады Марина Рейдина. – Егер біз өз өнімдерімізге жекелеген сауда орнын жасасақ, сөрелер түрлене түседі.

Вице-министр оң пікір білдірді. Айжан Бижанованың айтуынша, мұндай талап қойылып қойған. Дүкендердегі сөрелердің 30 пайызын жергілікті өндірілген өнімдер алуы керек.

Сондай-ақ, ішкі сауда субъектілері отандық өндіріс тауарларын көрнекі және физикалық қол жетімді жерлерде орналастыруы көзделеді.

– Бұл әрбір адам априори орындауы тиіс талап. Тәртіп бұзушылар әкімшілік жазаға тартылады, – деп қосты вице-министр. – Қосымша сауда орындарына келсек, мемлекет тарапынан қолдау бар. Тиісті 30 пайызға қосымша 20 пайыз қосылады, яғни дүкен витриналарының 50 пайызында Қазақстанда жасалған өнімдер болуы керек және тек 20 пайызында азық-түлік емес тауарлар болуы керек. Бұл норманы Ауыл шаруашылығы министрлігі мен Өнеркәсіп министрлігі белсенді түрде қолдауда.

Қазіргі уақытта Қазақстан Өзбекстан және БАӘ елдерімен ынтымақтасуда, бұл елдерде Қазақстанның сауда өкілдіктері жұмыс істейді. Сондықтан Айжан Бижанова ұлттық тауарларды экспорттаумен айналысуға кеңес берді. Оның айтуынша, министрлік отандық өнімді насихаттаумен тығыз айналысуда.