Барлық әлеуметтік нысандар қалыпты режимде жұмыс істеуде, деп хабарлайды @Pavlodarnews.kz тілшісі.

Ақсу қаласында қар тазалау жұмыстарына 17 арнайы техника және шамамен жүз коммуналдық қызметкер жұмылдырылды.

– Қосымша үш трактор тартылды. Маршруттарда екі патрульдік автокөлік пен бір біріктірілген жол тазалау машинасы кезекшілік атқаруда , – деп хабарлады қала әкімдігінде. 

Коммуналдық қызметтердің негізгі назары көшелерді, аялдамаларды, тротуарлар мен жаяу жүргіншілер өткелдерін тазартуға бағытталған – бұл жаяу жүргіншілер мен көлік қозғалысының қауіпсіздігін қамтамасыз ету үшін қажет.

Ертіс ауылында қар қалыңдығы 20 сантиметрге жетті. Аудан әкімдігінің мәліметінше, республикалық маңызы бар «Атамекен – Ертіс – Русская Поляна» автожолында үш техника жұмыс істеп жатыр. Тағы үш техника облыстық маңызы бар «Ертіс – Ертіс станциясы» және «Панфилов – Бестөбе» жолдарын қардан тазалауда. Барлық автожолдар ашық. Ішкі ауыл жолдары да назардан тыс қалған жоқ.

Железин ауданында да қар қалың түскен – жағалау маңында қар қабаты 18 сантиметрге жетті. Аудандық маңызы бар «Башмачное–Майлы», «Железин – Веселая Роща – Мыңкөл», «Лесное – Кузьмино» жолдарында үш техника, ал аудан орталығында қосымша екі техника жұмыс істеуде.

– Әр ауылдық округте қар тазалау техникасы шығарылды, – деп мәлімдеді аудан әкімдігі.

Қар тазалау жұмыстары Шарбақты ауданында да жедел басталды – мұнда үш техника жолдар мен көшелерді тазалауда. Осындай көлемде техника Успен және Павлодар аудандарында да жұмылдырылған.

Успен ауданында республикалық, облыстық және аудандық маңызы бар жолдарға бес техника тартылса, ауылішілік көшелерде тағы жеті техника жұмыс істеп жатыр.

Аққулы ауданында қардан кейінгі жолдар мен көшелердің қауіпсіздігін бес техника қамтамасыз етуде.

– Таңертеңнен бері республикалық трассада жеті техника, облыстық және аудандық жолдарда төртеуінен жұмыс істеп тұр, – деді Тереңкөл ауданы әкімдігі. – Электр және жылумен қамту жүйелері қалыпты жағдайда. Барлық өмірлік маңызы бар мәселелер жергілікті атқарушы органдардың бақылауында.

Май ауданы орталығында қар қалыңдығы 10 сантиметрден асты. Далалық аймақ пен аудандық жолдарда қар жаумаған. Республикалық маңызы бар «Атамекен – Ақсу – Курчатов» автожолына төрт техника шыққан, ал ауылішілік көшелерді тазалауға бес техника тартылған.

Төтенше жағдайлар департаментінің хабарлауынша, 11 қазанда Павлодар облысында қар жауып, көріну нашарлауда. Облыстың батысында, солтүстігінде және оңтүстігінде боран соғып, жолдарда көктайғақ байқалады.

Солтүстік-шығыстан соққан желдің екпіні 15–20 м/с-қа дейін жетеді. Күндізгі ауа температурасы 0…+5°С шамасында болады.

Еске салайық, Павлодар қаласында қар тазалау жұмыстарына 250-ге жуық коммуналдық қызметкер мен 300-ден астам арнайы техника шыққан.

Ауа райының қолайсыздығына байланысты Астана және Екібастұз бағытындағы республикалық маңызы бар автожол уақытша жабылды.