Жиһаздың сапасына қанағаттанбаған тұтынушы сатушыны сотқа берген, деп хабарлайды @Pavlodarnews.kz.

Павлодар қалалық сотымен облыс орталығының тұрғынның «Р» ЖК-не жиһаз жасау шартын бұзу және соманы өндіру туралы талап қою бойынша азаматтық іс қаралды.

Сот 2024 жылдың ақпан айында талап қоюшы мен жауапкер арасында корпустық жиһаз дайындауға шарт жасалғанын анықтады, оның шарттары бойынша жауапкер ас үй жиынтығын жасауға міндеттелді. Келісімшарт бойынша жиһаздың құны 1 050 000 теңгені құрады.

Алайда, ас үй жиынтығын жасап орнатқаннан кейін талап қоюшыны дайындалған жиһазының сапасы қанағаттандырмады.

Осыдан кейін талап қоюшы сотқа шартты бұзу және жауапкерден соманы өндіріп алу туралы талап қоюмен жүгінді.

Талаптар дайындалған ас үй жиынтығында көптеген ақаулардың болуымен және талап қоюшы оны пайдалануға мүмкіндігінің жоқтығымен уәжделді. Осы жиһазды сатып алуға несие ресімделген.

Сот талқылауының нәтижесінде тараптар дауды бейбіт жолмен шешуге келісті және медиациялық келісімге қол қойды.

Іс өндіріспен тоқтатылды. Ұйғарым заңды күшіне енді.