Өткен жылдың он бір айында өңірде кәсіпкерлік саласында барлығы 12 қылмыс тіркелген, деп хабарлайды @Pavlodarnews.kz тілшісі.

Облыстық «Атамекен» ұлттық кәсіпкерлер палатасының мәліметінше, бұл алдыңғы жылдармен салыстырғанда едәуір аз. Мәселен, 2024 жылы – 37, ал 2023 жылы – 43 дерек тіркелген.

Облыстық кәсіпкерлер палатасының директоры Ерқанат Әбенов бұл үрдіске оң баға берді.

– Мұндай статистика қуантпай қоймайды. Өңіріміздің бизнесі қолданыстағы заңнамаға сәйкес жұмыс істеуі маңызды. Кәсіпкерлік субъектілерінің заңға қатысты мәселелерінің азайып жатқаны – оң көрсеткіш. Сонымен қатар, біз «Атамекен» палатасы ретінде құқық қорғау және жергілікті атқарушы органдармен бірлесіп, бизнесті құқықтық мәселелерде қолдау жұмысын жалғастырамыз, – деді ол.

Өткен жылы тіркелген құқық бұзушылықтардың ішінде ең жиі кездесетіні – жұмыстарды нақты орындамай шот-фактура жазу, мұндай жеті дерек анықталған.

Айта кетейік, Мемлекет басшысы 2025 жылғы 8 қыркүйектегі Жолдауында кәсіпкерлерді негізсіз қысымнан және олардың қызметіне заңсыз араласудан қорғауға ерекше назар аударған болатын. Осы міндетті іске асыру аясында Қазақстан Республикасы бас прокуроры кәсіпкерлерді қылмыстық процеске заңсыз тартуға жол бермеу жөнінде арнайы нұсқау берген.

Мамандардың айтуынша, қылмыстар санының азаюы кәсіпкерлік ортадағы оң өзгерістерді және бизнесті қорғауға бағытталған қабылданып жатқан шаралардың тиімділігін көрсетеді. Бұл өз кезегінде кәсіпкерлер үшін құқықтық кепілдіктерді нығайтып, құқық қорғау органдарының алдын алу жұмысының нәтижелілігін арттырып отыр.