Павлодар облысында сотталғандарды жұмыспен қамту деректері бұрмаланған
Прокуратура ҚАЖ мекемелерінің бірінде есептегі көрсеткіштер мен нақты жұмыспен қамту деңгейінің сәйкес келмейтінін анықтады, деп хабарлайды @Pavlodarnews.kz тілшісі.
Облыс прокуратурасының мәліметінше, талдау барысында сотталғандардың еңбекпен қамтылу көрсеткіштерін қолдан арттыру фактілері анықталды.
Мекемедегі есеп бойынша еңбекке қабілетті 855 сотталғанның 494-і жұмысқа орналастырылған. Алайда прокуратура зейнетақы аударымдары мен әлеуметтік төлемдер туралы мәліметтерді салыстырған кезде олардың тек 205-інің нақты жұмыс істегені расталды.
Қалған 289 сотталған есепте жұмыспен қамтылғандар қатарына енгізілгенімен, іс жүзінде еңбек етпеген және олармен еңбек шарттары жасалмаған.
– Сотталғандарды жалған жұмысқа орналастыру «Еңбек-Павлодар» филиалының бұйрығымен ресімделген. Нәтижесінде еңбекпен қамту көрсеткіші 2,5 есеге артық көрсетілген, – деп хабарлады облыстық прокуратурадан.
Қадағалау органы мұндай бұзушылықтарға сотталғандарды жұмыспен қамту ісінің тиісінше ұйымдастырылмауы себеп болғанын анықтады.
Прокуратураның ұсынуын қарау нәтижесінде кінәлі лауазымды тұлғалар тәртіптік жауапкершілікке тартылды.
