«Жас заңгер» клубы Toraighyrov University базасында өз жұмысын бастады, деп хабарлайды @Pavlodarnews.kz тілшісі.

Павлодарда полиция мен жоғары оқу орны жаңа буын тергеушілерін даярлау мақсатында күш біріктірді.

– Клубтың басты ерекшелігі – арнайы білім беру бағдарламасы бойынша оқыту. Бұл бағдарлама студенттерге диплом алғаннан кейін бірден ішкі істер органдарына жұмысқа орналасуға нақты мүмкіндік береді. Дәстүрлі дәрістердің орнына студенттер мамандыққа толықтай бейімделеді. Полиция департаменті базасында студенттер үшін тергеу-криминалистикалық полигон жабдықталған. Мұнда болашақ заңгерлер оқиға болған жерді қарау тактикасын іс жүзінде меңгереді, – дейді Toraighyrov University аға оқытушысы, құқықтану кафедрасының аспиранты Марина Баданина.

Студенттер тәжірибе барысында кәсіби мамандардың жұмысын көзбен көріп, қылмыскерлер қалдырған іздерді анықтауды, тіркеуді және дұрыс алуды үйренеді. Сондай-ақ жастарға заманауи арнайы техника мен соңғы ғылыми жетістіктер негізінде жабдықталған криминалист чемодандары таныстырылады.

Жуырда екіжақты меморандум аясында тәжірибелі мамандар мен болашақ әріптестердің үлкен кездесуі өтті. Тергеу басқармасы бастығының міндетін атқарушы Даурен Көпжасаров криминалистикалық басқарманың сарапшыларымен бірге ToU құқықтану кафедрасының студенттері мен оқытушыларымен кездесті.

Кездесу барысында спикерлер төтенше жағдай орын алған жердегі іс-қимыл алгоритмін кезең-кезеңімен түсіндіріп, тергеу бөлімшелеріне қызметке қабылдау тәртібі туралы жан-жақты ақпарат берді.

Жоғары оқу орны ғылымы мен полиция тәжірибесінің ықпалдастығы өз нәтижесін беріп келеді. Қазақстан Республикасы Ішкі істер министрлігінің басшылығы жыл сайын үздік түлектерге атаулы жұмысқа шақыру жолдамаларын табыстайды. Мәселен, өткен жылдың қорытындысы бойынша павлодарлық 20 студент ішкі істер органдарында кепілдендірілген жұмыс орындарына ие болды.