Облыс орталығында су тасқынының бірінші кезеңі сәтті өтті, деп хабарлайды  @Pavlodarnews.kz тілшісі.

Бұл туралы VІII сайланған Павлодар қалалық мәслихатының  XVI кезекті сессиясында  Павлодар қаласы ТЖ басқармасының бастығы Еркін  Қаукенов  мәлім етті. 

– Павлодар қаласының аумағындағы су тасқыны кезеңі екі фазада өтеді: қардың еруі, Шығыс Қазақстан облысы су қоймаларының жоғары Ертіс каскадынан табиғатты қорғау мақсатында су босату. Павлодар қаласының аумағында жеке сектордың тұрғын үйлерін су басу тіркелген жоқ. Қала аумағында су басу қаупі бар екі елді мекен бар: Кенжекөл және Атамекен. Бүгінгі күні «Қазгидрометтің» деректеріне сәйкес топырақтың қатып қалуы 83 сантиметрді құрайды, – деді Еркін  Қаукенов.  

Басқарма басшысының айтуынша, су тасқыны кезеңіне дайындық шеңберінде Павлодар қаласының ТКШ, ЖК және АЖ бөлімінің қала көшелерін күтіп ұстау бойынша мердігерлік ұйымдары және әкімдік күштерімен қысқы және көктемгі кезеңдерде қаланың көшелері мен жүріс бөліктерінен қар шығару жұмыстары жүргізіледі, тұрғын үй секторын су басу қаупі бар аумақтарға ерекше назар аударылады.  Ол үшін бес бригада, 25 автосамосвал және бес тиегіш жұмылдырылды.  Қала көшелері мен елді мекендерінен 639 мың тоннадан астам қар шығарылды. 

–  2024 жылғы су тасқынына қарсы іс-шараларды өткізуге бюджетпен тек қала аумағына 90 миллион теңгеден астам қаражат көзделген, – деді Еркін  Қаукенов.  

Кенжекөл ауылы мен Атамекен кентіндегі тұрғын үйлерді су басуына жол бермеу бойынша жыл сайын үйінділерге топырақ жеткізу жұмыстары жүргізіледі. Атамекен кентінде 1300 тоннаға жуық топырақ әкелінді, 100 метрге жуық үйінді нығайтылды. Кенжекөл ауылында 3700 тоннадан астам топырақ жеткізіліп, 1000 метр үйінді нығайтылды.

Айта кетерлігі, қалада және елді мекендерде 49 су өткізу құрылғысы, қалада алты құбыр, елді мекендерде 49 құбыр бар.