Вакцина бірінші кезекте балалар мен созылмалы аурулары бар науқастарға салынады, деп хабарлайды @Pavlodarnews.kz. 

Павлодар облысының тұрғындарын тұмауға қарсы вакцинациялау 15 қыркүйекте басталады. 

Бұл туралы өңірлік коммуникациялар қызметінде өткен брифингте денсаулық сақтау басқармасы басшысының орынбасары Айгүл Мұқышева мәлімдеді. 

- Осы жылы денсаулық сақтау басқармасы тұмауға қарсы "тұмау плюс" вакцинасының 90 мың дозасын сатып алды. 1 қарашаға дейін біз вакцинация процедурасын аяқтауымыз керек, - деді ол. 

Ең алдымен, вакцинация тәуекел санатындағы адамдарға жасалады. Яғни мұнда балалар, екінші және үшінші триместрдегі жүкті әйелдер, тыныс алу органдарының созылмалы аурулары бар науқастар, жүрек-қан тамырлары жүйесі, онкопатологиясы бар науқастар ала алады. 

Айта кетелік, тұмауға қарсы екпе тегін салынады.