М.Әлімбаев атындағы мектепте педагогикалық сыныптың жұмысын қайта бастау жоспарлануда, деп хабарлайды @Pavlodarnews.kz тілшісі.

Әлкей Марғұлан атындағы Павлодар педагогикалық университетінде «педагогикалық сыныптар» жобасына қатысушылар мен «Mugalim Pavlodar» жобасына қатысушы университет студенттерінің кездесуі өтті.

2021 жылдан бастап Марғұлан университеті «педагогикалық сыныптар» жобасын іске асыруда, оған мұғалім мамандығын таңдауға ұмтылған 8-11- сынып оқушылары қатысады. Меморандум аясында университет облыс орталығындағы №2 ЖОМ, Майқайың кентіндегі М.Әуезов атындағы ЖОМ, Железин ауданындағы «Хұсни» қыздар гимназиясы және Екібастұздағы «Парасат» интеллект мектебін қоса алғанда, бірнеше оқу орнымен белсенді жұмыс істейді. Сондай-ақ, М.Әлімбаев атындағы мектепте педагогикалық сыныптың жұмысын қайта бастау жоспарлануда.

Марғұлан университетінің кәсіптік бағдар беру жұмысы бөлімінің бастығы Гүлнар Мұсанова атап өткендей, педагогикалық сыныптар оқушылардың болашақ мамандықты таңдауға саналы түрде жақындауы және мұғалім жұмысының ерекшеліктерімен жақынырақ танысуы үшін құрылған.

– Кездесудің мақсаты болашақ педагогтарды дамытуға және білім сапасын жақсартуға бағытталған екі жобаның бірлескен жұмысы болды, – дейді Гүлнар Мұсанова.

Жоба жетекшісі Мәди Әміров студенттер мен оқушыларды тәжірибе және білім алмасу үшін біріктіретін «Mugalim Pavlodar» жобасының маңыздылығы мен мақсаттары туралы айтып берді. Жобаға университеттің 1-4 курс студенттері қатысады, олар оқушыларды қолдауға бағытталған білім беру бастамаларын әзірлеумен және іске асырумен белсенді айналысады.

Мұндай ынтымақтастық студенттердің тәжірибесін байытып қана қоймай, оқушыларға педагогикалық мамандықтың ерекшеліктерін жақсы түсінуге көмектеседі. Болашақта кездесулерге қатысушылар өз мектептерінде білім беру ортасын дамытуға бағытталған өз жобалары мен бастамаларын құра алады.