Жыл басынан бері түнгі уақытта заңды өкілдерінсіз жүрген 877 жасөспірім анықталды, деп хабарлайды @Pavlodarnews.kz тілшісі.

Облыстық полиция департаменті жаз мезгілінде балалардың қауіпсіздігін қамтамасыз ету үшін ата-аналарға ұсыныстар берді. Тәртіп сақшылары балалардың кіммен және қайда жүргенін қадағалауды, олардың достарының байланыс нөмірлерін білуді ескертеді. Полиция кәмелетке толмағандардың өмірі мен қауіпсіздігі үшін ата-аналар жауапты екенін еске салады.

– Жыл басынан бері түнгі уақытта заңды өкілдерінсіз жүрген 877 жасөспірім анықталды. Мысалы, сағат 23:25-те компьютерлік клубта ата-аналарынсыз екі жасөспірім, ал түнгі сағат 00:00-де жазғы кафеде бір жасөспірім ұсталды. Жасөспірімдер полиция бөлімшесіне жеткізіліп, ата-аналары шақыртылды, – деді облыстық полиция департаментінің баспасөз қызметі.

Сонымен бірге, заңды өкілдерінсіз кәмелетке толмағандарды 22:00-ден кейін мекемеге кіргізген көңіл көтеру орындарының иелері де жауапкершілікке тартылды. Сот шешімімен 30 кәсіпкерге 10-нан 30 АЕК-ке (39 320 теңгеден 117 960 теңгеге) дейін айыппұл салынды.

Полиция балалардың қауіпсіздігін қамтамасыз ету жұмыстарын жалғастыратынын хабарлады және күдік туғызатын жағдайларда «102» нөміріне хабарласуды сұрайды.