Азаматтарға мемлекеттік жылжымайтын мүлік тізілімі арқылы олардың жылжымайтын мүліктеріне заңды құқықтарды тіркеу, өзгерту және жою туралы өзекті ақпаратты беретін жаңа цифрлық сервис іске қосылды, деп хабарлайды @Pavlodarnews.kz тілшісі.

«Азаматтарға арналған үкімет» Мемлекеттік корпорациясы» КЕ АҚ Павлодар облыстың филиалының мәліметінше, сервис адамдардың меншік құқықтарын тіркеуге, құқықтарын шектеу мен қамауға алуға, сондай-ақ электрондық үкімет порталының ақпараттық жүйесінде қателер анықталған жағдайда түзетулер енгізу туралы хабарламалар жібереді. 

Жаңа қызмет түрі «жылжымайтын мүлікті есепке алудың бірыңғай мемлекеттік жүйесін» енгізу кезінде автоматтандыру процесінің бөлігі ретінде құрылды.

– Пайдаланушылардың мемлекеттік тіркеу жүйесіндегі мүліктеріне қатысты кез келген өзгерістерді «eGov.kz» сайтындағы электрондық үкіметтен келетін хабарламалар мен PUSH-хабарламалар арқылы қадағалауға мүмкіндігі бар, – деп жазылған хабарламада.

Айта кетейік, хабарландырудың жаңа тетігі азаматтардың жеке деректерін қорғауды жақсартуға, операцияларды бақылауды күшейтуге және пайдаланушылар үшін шұғыл ақпаратқа қол жеткізуді жеңілдетуге арналған.