Тазалық жұмыстарына ауыл тұрғындары мен қызметкерлер атсалысты, деп хабарлайды @Pavlodarnews.kz тілшісі.

«Таза Қазақстан» экоакциясы аясында аудан орталығында ұйымдастырылған тазалық іс-шарасына ауыл тұрғындары, мемлекеттік қызметкерлер, аурухана қызметкерлері, депутаттар белсенді қатысты.  

–  Барлық мекемелердің қызметкерлері сенбілікке шықты. Ауылдағы саябақтар, көшелер, аула маңдарына тазалық жұмыстары жүргізілді. Ауыл бойынша бұл жұмыстарға шамамен 150-200 адам жұмылдырылды, – дейді ауыл әкімі Қуаныш Пістебаев.

Оның айтуынша, мұндай акциялар жиі ұйымдастырылып тұрады және тұрғындар әрдайым көмекке дайын болады. 

– Әрдайым ұжымымызбен осындай жұмыстарға қатысып тұруға тырысамыз. Өзіміздің ауданымыздың көркеюі үшін жас маман ретінде қолымыздан келгенше үлес қосудамыз. Тазалық – денсаулық кепілі, – дейді Ақтоғай аудандық ауруханасының медбикесі Бәтима Ерболат. 

Айта кету керек, ел президенті Қасым-Жомар Тоқаев өзінің сөзінде «Елімізді абаттандыру және көгалдандыру – үлкен мемлекеттік маңызы бар іс» екенін атап өткен еді.