«AMANAT» партиясының облыстық филиалында жол картасының проблемалық нысандары мен 2025 жылғы тәуекелдер талқыланды, деп хабарлайды @Pavlodarnews.kz тілшісі.

Жол картасының 35-тармағына сәйкес алты ауылдық медициналық нысан әлі де аяқталмаған. Аптаның соңына дейін олардың үшеуінде – Үштерек, Құркөл және Ивановка ауылдарында қабылдау актілеріне қол қою жоспарланып отыр. Ал Мыңкөл ауылындағы медпункт бойынша мердігер «ҚАЙРАТ ЭК» ЖШС өз міндеттемелерін орындамағандықтан, материалдар сотқа жіберілген.

Депутат Сандуғаш Қалижанова бұл салада жүйелі проблемалар бар екенін атап өтті:

– Ішкі талдау жүргізілмейді. Қай жерде қандай нысандар салынғанын және нақты қай ауылдарға медпункттер қажет екенін түсіну керек. Осы олқылықтың салдарынан экономика басқармасы бюджетке дұрыс жоспар жасай алмай отыр. Бұл – басты мәселе, – деді ол.

Білім беру нысаны да қауіп төндіріп отыр. Құрылыс басқармасының мәліметінше, Павлодардағы №47 мектеп тамыз айының соңына дейін аяқталады деп күтілуде. Дегенмен, онда сабақтар оқу жылының екінші тоқсанынан бастап қана басталмақ.

«Ауыл аманаты» бағдарламасы да жеке талқыланды.

Депутат Асылбек Туғанбай ауыл шаруашылығы министрлігінен облысқа неге аз қаражат бөлінгенін сұрағандарын және Министрлік қажеттілікті өңірдің өзі анықтайды деп жауап бергенін атап өтті. 

Сондай-ақ, мүгедектігі бар адамдарға арналған оңалту орталығын салу мәселесі де қаралды. Қатысушылар нысанның орны ұзақ уақыт бойы анықталып, соған байланысты мерзімдердің кейінге шегерілгенін айтты.

– Жобалық-сметалық құжаттама қазір сараптамада. Қаржыландыруға өтінім беру тек жылдың соңына қарай жоспарланып отыр, – деді жұмыспен қамтуды үйлестіру және әлеуметтік бағдарламалар басқармасының өкілдері.

Айнұр Мұхамедиярова кешенді көзқарастың қажеттілігін атап өтті:

– 2024–2025 жылдарға арналған 41-тармақ орындалмаған – барлығы тоғыз нысан. Ұсынысым – мониторингтік топ құрып, денсаулық сақтау басқармасымен бірлесіп, сол тоғыз ауылды аралап, бұл медициналық нысандарға нақты қажеттілікті анықтау. Тек содан кейін Жол картасының индикаторларын түзету және бюджетке өтінім беру мәселесін қарастыру қажет, – деді ол.

Сонымен қатар Май ауданының Саты ауылындағы медпункттің ахуалы сын көтермейтіні айтылды. Бұл нысан Жол картасына енгізілген. Жобалық-сметалық құжаттама дайын, және фракция мүшелері бюджетке өтінім беруді жақын арада жүзеге асыруды ұсынды.