Енді 4G желісі толық қуатта жұмыс істейді, деп хабарлайды @Pavlodarnews.kz.

Биыл наурыз айында облыс әкімінің тапсырмасымен Павлодар ауданының ұялы байланыс сапасын жақсарту мен интернет жылдамдығын арттыру  мақсатында көшпелі отырыс өткен болатын. Сол кезде аудандық бюджет есебінен  Набережное мен Жаңақала ауылдарында антенна-діңгек құрылысын орнату туралы шешім қабылданды. Төрт айдан кейін мақсат қойылған міндет орындалды. Павлодар ауданындағы екі ауылда байланыс пен интернет сапасы едәуір жақсарды. 

– Набережное ауылында 25 метрлік ауылдарында антенна-діңгек құрылғысы орнатылды. Бұрын осы ауылда жеке тұрғызылған мұнара арқылы байланыс ұстайтын. Бірақ оның биіктігі 14 метр ғана болатын, бұл сапалы байланыс үшін жеткіліксіз еді. Интернетке келсек, ол тек ауылдың қиыр шетінде жақсы ұстайтын. Енді жаңа құрылғымен 4G желісінің жылдамдығы арта түседі, – деді Павлодар ауданының баспасөз хатшысы Заур Совет.

Аталмыш ауылда 1423 адам тұрады. Ал Набережное ауылынан алты шақырым жерде 600-ден астам халқы бар Жаңақала ауылы орналасады. Ол жерде де нашар байланыс мәселесі тұрғындарды алаңдатқан. Енді алты миллион теңгеге орнатылған антенна-діңгек құрылғысы екі ауылдың тұрғындарына сапалы байланыс пен интернетті таратады. Бүгінде қандай оператор қызмет көрсететіні шешілуде. Келіссөздер аяқталу сатысында. 

Еске сала кетейік, өңірде «Қолжетімді интернет» ұлттық жобасы аясында екі негізгі бағыт жүзеге асырылуда: талшықты-оптикалық байланыс желісі мен антенналық діңгектердің құрылысы.

Бірінші жоба бойынша 2027 жылдың соңына дейін Павлодар облысындағы 204 ауыл жоғары жылдамдықты интернетпен қамтамасыз етіледі. Талшықты-оптикалық байланыс желісі бойынша интернет жылдамдығы 50-ден 500 Мбит секундына дейін жеткізуге мүмкіндік береді.

Ал, антенналық діңгек құрылымдарын салу жол инфрақұрылымының бұрын нашар болған аумақтарында тұрақты ұялы байланыс пен интернетке қолжетімділікті қамтамасыз етеді. Антенналар облыстық пен республикалық маңызы бар автомобиль жолдарының бойында және Ресеймен шекарада 12 дана көлемінде «Павлодар-Астана», «Павлодар- Қарағанды», «Павлодар-Өскемен-РФ» жол бағыттары бойынша орнатылады.