Мемлекеттік бюджетке 11,4 триллион теңгеден астам қаражат түсті. Бұл өткен жылдың осы кезеңімен салыстырғанда 16%-ға жоғары, деп хабарлайды @Pavlodarnews.kz тілшісі ҚР Қаржы министрлігіне сілтеме жасап.

Бұл көрсеткіштер экономикалық белсенділіктің оң динамикасының сақталғанын және бюджет кірістерінің тұрақты өсіп отырғанын көрсетеді. Республикалық бюджеттің кіріс бөлігі 100,9%-ға орындалды. Жоспарланған 7,34 триллион теңгенің орнына нақты түсімдер 7,41 триллион теңгені құрап, болжамнан 66,7 миллиард теңгеге артық болды. Қаңтар–мамыр айларымен салыстырғанда республикалық бюджет кірістері 25,1%-ға немесе 1,48 триллион теңгеге өсті.

Жедел мәліметтер бойынша жергілікті бюджеттердің түсімі 4,05 триллион теңгені құрады. Бұл өткен жылдың сәйкес кезеңімен салыстырғанда 95,1 миллиард теңгеге немесе 2,4%-ға артық.

Республикалық бюджет кірістерінің негізгі бөлігін трансферттерді есептемегендегі салықтық түсімдер қамтамасыз етті. Олардың үлесі 97,7%-ды құрады. Салықтық түсімдер жоспары 100,5%-ға орындалып, өсім 30,6%-дан асты. Кірістердің айтарлықтай ұлғаюына қосылған құн салығы, корпоративтік табыс салығы, пайдалы қазбаларды өндіру салығы және шикі мұнай экспортына салынатын кедендік баж түсімдері ықпал етті.

Өсімнің негізгі факторлары ретінде әлемдік шикізат нарығындағы қолайлы баға конъюнктурасы, іскерлік белсенділіктің артуы, экономикалық өсім және салық реформасының жүзеге асырылуы аталып отыр.

Үкімет мемлекеттік бюджеттің даму бюджеті мәртебесін сақтап отырғанын атап өтті. Қомақты қаражат ұзақ мерзімді экономикалық өсім мен халықтың өмір сүру сапасын жақсартуға негіз болатын инфрақұрылымдық жобаларды іске асыруға бағытталуда.

Басым бағыттардың қатарында автомобиль жолдарын салу және қайта жаңғырту, инженерлік және коммуналдық инфрақұрылымды жаңарту, көлік-логистикалық дәліздерді дамыту, сондай-ақ энергетика, сумен жабдықтау және цифрландыру салаларындағы жобаларды жүзеге асыру бар.

Мамандардың пікірінше, бұл шаралар өңірлер арасындағы байланысты күшейтіп, азаматтардың сапалы қызметтерге қолжетімділігін арттыруға, жаңа жұмыс орындарын құруға және қосымша жеке инвестицияларды тартуға мүмкіндік береді.

Жылдың алғашқы бес айының қорытындысы бойынша бюджет орындалуының нәтижелері мемлекеттің кіріс базасының тұрақтылығын және экономикалық белсенділіктің артуы аясында түсімдердің оң динамикасының сақталғанын көрсетті.