Өткен жылы дезинсекцияға бөлінген 39,9 миллион теңгеден 9,8 миллионы қалды, деп хабарлайды @Pavlodarnews.kz тілшісі.

Железин ауданында шыбын-шіркеймен күресу бойынша алдағы шаралар талқыланды. Өткен жылы мұнда байқау өткізіліп, «ИнжиСтройПроект» ЖШС-мен жаз айларында шыбын-шіркеймен күресу үшін үш жылдық келісім-шарт жасалды.

Облыстық бюджет есебінен Железин ауданының ормандары мен ауылдарына әуеден дезинсекция шаралары жүргізіледі. Тапсырыс беруші – облыстық жер қойнауын пайдалану, қоршаған орта және су ресурстары басқармасы.

Ауданда 33 елді мекен болса, оның жетеуі Ертіс жағасында. Железин (763 га), Пятерыжск (471 га), Моисеевка (311 га), Береговое (197 га), Башмачное (200 га), Прииртышск (150 га) және Урлютюб (208 га) ауылдары өңдеуге жататыны анықталды. 

Былтыр дезинсекция жұмыстары мамыр айының басында ғылыми топ мүшелерінің қатысуымен басталды. Жаздың соңына дейін мердігерлер өңдеу орындарына 40 рет шыққан: 17 рет түтін генераторларымен және 23 рет аспалы бүріккіштермен.