Шарбақты аудандық кітапханасында өткен шараны Қызыр мешіті ұйымдастырған, деп хабарлайды  @Рavlodarnews.kz.

ҚМДБ-ның Павлодар облысы бойынша баспасөз қызметінің мәліметінше, «Дін мен дәстүр» бағыты бойынша облыс мешітінің дін қызметшілері арасында  білім жарысы өткізілді.  Шараға облыс бойынша барлық қала, аудан мешіттерінен 20-дан астам адам қатысып, өзара жарысқа түсті. 

–  Жарыс ҚМДБ-ның сараптамасы арқылы жарыққа шыққан «Дін мен дәстүр»  кітабы бойынша дайындалған билет сұрақтары бойынша ұйымдастырылды. Қатысушылардың нәтижелерін анықтайтын әділқазылар алқасы құрамында Екібастұз қаласының бас имамы Нұрсейіт Әбутәліпұлы, қалалық  «Умар әл-Фаруқ» мешіті имамы Совет Есімбек, қалалық «Әбу Бәкір Сыддық»  медресесінің ұстазы Нұрсұлтан Қуатұлы төрелік етті, – деді ҚМДБ-ның Павлодар облысы бойынша баспасөз хатшысы Амантай Тойшыбайұлы.

Жарыстың мақсаты – қазақ халқының тұрмыс-тіршілігінде қолданатын діни рәсімдерді, салттық, ғұрыптық дүниелердің дінмен  байланысы  жоралғылар мен рәсімдер, өнер, спорттық іс-шаралар, қазақтың ұлттық ойындары, мәдениетінің түп негізінің дін рәсімдерінен алынғандығын, сабақтастығын айқындау. Сонымен қатар мешіттер жамағаты мен басқа аудан, ауыл, тұрғындарымен өзара қарым-қатынас жасап тәжірибе алмасу болды.

Сайыс тартысты жалғасып, нәтижесінде Павлодар ауылы «Қасым қажы» мешітінің молдасы Қуат Әбуұлы 1-орын,  Ақсу қалалық мешітінің өкілі Бауыржан Талғатұлы 2-орын, Тереңкөл ауданы мешітінің қатысушысы Ербол Сейтахмет 3-орынды қанжығасына байлады. 

Қатысушыларды Шарбақты ауданы «Қызыр» мешіті бас имам Исабек Ақжол Алғыс хаттармен марапаттап, жеңімпаздарға ақшалай сыйлық табыстады. 

Қатысушыларға ас мәзірі ұйымдастырылып, қонақжай дастарханы жайылды.