Екібастұзда есірткі зертханасы жойылды
Оны қаланың екі тұрғыны ұйымдастырған, деп хабарлайды @Pavlodarnews.kz тілшісі.
Polisia.kz ақпараттық-медиа порталының мәліметінше, Ішкі істер министрлігі Павлодар облысының Екібастұз қаласында синтетикалық есірткі өндіру бойынша жасырын зертхананы жойды.
Ұсталғандардың тұрғылықты жері бойынша тінту іс-шаралары барысында жалпы салмағы бір килограмнан асатын альфа-PvP психотроптық заты, отандық және шетел валютасындағы қаражат, электрондық таразылар, сондай-ақ синтетикалық есірткі өндіруге арналған құрылғылар мен жабдықтар табылды. Сонымен қатар 120 литрден астам прекурсор тәркіленді.
– Қаскөйлер есірткіні шағын партияларға бөліп, курьерлердің көмегімен интернет арқылы сатуды жоспарлаған. Ұсталғандарға қатысты есірткі зертханасын ұйымдастыру және синтетикалық есірткі өндіру фактісі бойынша сотқа дейінгі тергеу басталды. Олар уақытша ұстау изоляторына қамалды, – деп атап өтті ведомствода.
Жыл басынан бері полиция 48 есірткі зертханасын жойды, онда 250 кг қолдануға дайын синтетикалық есірткі, 2,5 тоннадан астам прекурсор және 72 келіден астам каннабис түріндегі есірткі тәркіленді. Есірткі бизнесі саласындағы 11 ұйымдасқан қылмыстық топтың әрекеті тоқтатылды. Заңсыз айналымнан 19 тоннадан астам түрлі есірткі, оның ішінде 5 тоннаға жуық марихуана мен 420 кг синтетикалық есірткі тәркіленді.
