Бұл бастама облыстық білім беру басқармасына тиесілі, деп хабарлайды @Pavlodarnews.kz тілшісі.

Павлодар облысындағы «Адал азамат» бірыңғай білім беру бағдарламасы аясында «Асық-STRIKE» жобасы жүзеге асырылуда. Жоба ұлттық ойындарды жаңғырту және оларды білім беру процесіне жүйелі түрде енгізуді мақсат етеді. Осы мақсатта «Алтын сақа» инновациялық шығармашылық орталығында осындай атаумен бөлме ашылды.

Салтанатты лентаны кесу құрметі ұлттық спорт түрлерін насихаттаушы Жиенхан Қаманайдың немересі Альфия мен облыстық асық ату федерациясының басшысы Қалибек Қуанұлына сеніп тапсырылды. Ол қатысушылардың барлығын осы маңызды оқиғамен құттықтап, оларға табыс тіледі.

Іс-шараға Павлодар облысы әкімінің орынбасары Айгүл Мәлікова қатысты. Ол жастар арасында ұлттық спорт түрлерін сақтау мен насихаттаудың маңыздылығын атап өтті.

- Асық ату – ептілікті, логикалық ойлауды және төзімділікті дамытатын ойын. Осы сынып арқылы балаларымыз төл ойынымыздан сусындайды деп үміттенемін. Бүгінгі өзгермелі әлемде ұлттық ерекшелікті сақтау бұрынғыдан да маңызды болып келеді. Сіздерге сәттілік тілеймін, - деді Айгүл Мәлікова.

Іс-шара сыныптың ашылуымен шектелмеді. «Ертіс» телеарнасының басшысы Жұмабек Сманов «Алтын сақа» инновациялық шығармашылық орталығының «Шерту – шеберлік шыңы» кітабын таныстырды. Бұл шығарма асық ату ойынына арналған оқу құралы болып табылады.

«Алтын сақа» инновациялық шығармашылық орталығының басшысы Саян Мұқанов павлодарлықтардың Қазақстан Республикасы Білім министрлігіне кітапты ұлттық ойынды сыныптан тыс оқытуға арналған ресурс ретінде тану туралы өтініш білдіріп жатқанын хабарлады.