Энергетика министрлігі еліміздің ішкі нарығын жанармаймен қамтамасыз етудің қазіргі жағдайына қатысты түсінік берді, деп хабарлайды ҚазАқпарат тілшісі.

«Тамыз айында өндірілетін жанар-жағармай көлемі елдің ішкі нарығында қажет көлемді жабады. Мұнай өңдеу зауыттарынан жөнелтілген көлемді ескере отырып, 15 тамыздағы жағдай бойынша елдің мұнай базаларында АИ-92 маркалы бензинінің жиынтық қалдықтары 262 мың тоннаны құрады. Бұл көлем орта есеппен 19 күнге жетеді, оның ішінде МӨЗ-дегі қор – 12,1 мың тонна», - делінген минстрлік мәліметінде.

Сонымен қатар, АИ-95 маркалы бензинінің қоры 48 мың тоннаны құрап, 16 күнге жетеді. Соның арасында мұнай өңдеу зауыттарындағы қор 4,2 мың тоннаны құрады.

«Биылғы тамыз айында 403 мың тонна АИ-92 бензинін өндіру жоспарланған. Жалпы, ішкі нарықтағы сұраныс шамамен 380 мың тонна болады деп ескерілген. Тамыз айының басындағы 265 мың тонна көлеміндегі қалдықты ескере отырып, отынның осы түрінің жалпы көлемі 668 мың тоннаға жетеді. Бұл тұрғыда қазіргі өндіріс бензин бойынша ішкі сұранысты толығымен жабады. АИ-92 қалдығы тамыз айының соңында 291 мың тоннаның құрамақ», - деп аталып өткен ведомство ақпаратында.

Шымкент мұнай өңдеу зауытында атқарылған жұмыстарды және осы зауытта АИ-95 өндіру болмағанын ескере отырып, теңгерімді сақтау үшін АИ-95 импорты жоспарланған болатын. Петросан 70 мың тонна, Газпромнефть 12 мың тоннаға келісімшарт жасады. Тамыз айында импорт - 21 мың тонна.

Естеріңізге сала кетейік, АИ-95 маркалы бензиніне шекті баға бойынша мемлекеттік реттеу қолданылмайды. Бұл ретте баға нарықтағы сұраныс пен ұсыныс негізінде айқындалады.

Атап айтқанда, бір литр АИ-92 автобензинінің шекті бағасы мемлекеттік баға реттеуге байланысты 205 теңгеден аспауы тиіс.