Тәртіп сақшылары азаматтарға мұқият болуға және күмәнді мәмілелерге келіспеуге кеңес береді, деп хабарлайды  @Pavlodarnews.kz тілшісі.

Облыстық полиция департаменті баспасөз қызметінің мәліметінше, облыс орталығының 37 жастағы тұрғыны бірқатар алаяқтық жасады деген күдікке ілінген. 

– Ер адам азаматтарға ақшалай сыйақы үшін және емтихан тапсырмай-ақ жүргізуші куәлігін рәсімдеуді ұсынған. Ол құрбандарға барлық процестердің заңды екенін айтқан. Алайда алдын ала ақша алғаннан кейін байланысқа шықпай қойған, – дейді департаментте. 

Жедел іздестіру іс-шараларын жүргізу барысында күдіктінің осыған ұқсас 20 фактіге қатысы бар екені анықталды. Сондай-ақ оның Павлодарда халыққа қызмет көрсету орталығында көптеген байланысы бар екені анықталды. 

Аса ірі мөлшерде алаяқтық фактісі бойынша  қылмыстық іс қозғалды. Күдікті уақытша ұстау изоляторына қамалды.