Мереке Естай атындағы Мәдениет сарайының фойесінде басталды, деп хабарлайды @Pavlodarnews.kz тілшісі.

Қазақстанның танымал фотографы Жанарбек Аманқұловтың көрмесінде кәсіпорын қызметкерлері өздерін жұмыс процесінде түсірілген суреттерден таныды. Сол жерде ERG Service электргазбен дәнекерлеушісі Станислав Чевтаевтың ерекше арт-инсталляциясын тамашалауға да мүмкіндік болды. Ол ассамбляж техникасында таңғажайып туындылар жасайды. Ауыр металл соғудан және дәнекерлеуден кейін өнер туындысына айналады.

Бірақ бұл тосынсыйлар тек бастамасы ғана еді. Кәсіпорынның мерейтойына және алдағы Металлургтер күніне арналған мерекені ұйымдастырушылар Қазақстандағы ең ірі әртараптандырылған сервис компаниясының қызметкерлеріне көптеген сыйлықтар дайындаған.

Компания өнеркәсіптік жабдықтарды жөндеумен, метал өнімдерімен және машина жасаумен айналысады. «ERG Service» ЖШС құрамына Ремонттық-механикалық метал өнімдері зауыты, Рудный және Павлодар жөндеу басқармалары, сондай-ақ Павлодар машина жасау зауыты кіреді. Осы кәсіпорындардың қызметкерлері компанияның алғашқы мерейтойын бірге атап өтті. Осыған орай, он жыл бұрын қандай болды және бүгінгі ERG Service туралы фильм дайындалды.

Кәсіпорынның қалыптасу тарихын оның бас директоры Сергей Перепечин баяндап берді. 2015 жылы Павлодардағы машина жасау зауыты базасында сервистік компания құрылды. Оның басты мақсаты – топ ішіндегі өндіріс пен жөндеуді жылдам, сапалы әрі тиімді ету болатын. Коллектив 500 адамнан алты мыңнан астам білікті қызметкерге дейін өсті.

– Бүгін машина жасау зауыты – біздің инженерлік жүрегіміз, – деді Сергей Перепечин. – Мұнда крандар, технологиялық және энергетикалық жабдықтар дүниеге келеді. Қазақстанда теңдесі жоқ бірегей конструкциялар да осында жасалады.

Кәсіпорын энергетикалық, технологиялық және тау-кен көлік жабдықтарының үздіксіз жұмысын диагностикадан бастап күрделі жөндеуге дейін қамтамасыз етуді өз міндетіне алған.

ERG Service-тің тағы бір мықты тұсы – металлургия. Мұнда металмен жұмыс істеуді жақсы меңгерген. Бірақ компанияның ең басты байлығы – оның адамдары.

– Өсу мен инновация жолында бізбен бірге болған барлықтарыңызға рақмет, – деді бас директор. – Болашағымызды ойлап, алға басар қадамды ойластырып отыратындарға да ерекше рақмет, өйткені біздің басты мақсатымыз – саланың бір бөлігі болу ғана емес, оның бет-бейнесін қалыптастыру.

Компания қызметкерлерін Павлодар облысының әкімі Асайын Байханов та құттықтады.

– Сіздердің ауыр әрі табанды еңбектеріңіз шынайы құрметке лайық, – деді өңір басшысы. – Әсіресе компанияның негізін құраған, күш-жігерін, білімін және бірлігін арнаған ұжымға алғыс айтамын. Сіздердің еңбектеріңіздің арқасында кәсіпорын дамып, жаңа белестерді бағындыруда.

Асайын Байханов үздік бес қызметкерге Құрмет грамоталары мен алғыс хаттарын табыстады. Одан кейін жаңа көпқабатты үйден пәтер алу сертификаттарына ие болған қызметкерлер сахнаға шақырылды. Жаңа пәтерге ие болған алғашқы адам – машина жасау зауытының құйма-механикалық цехының қорытпаларды құюшысы Яков Николенко.

– Мен бұл кәсіпорынға лицей бітірген соң 20 жасымда газоэлектродәнекерлеуші болып келдім, – деп еске алады Яков Николенко. – Тәлімгерлер жақсы болды, бәрін тез үйрендім. Кейін мені қорғасын-қалайы қорытпаларын құюшы етіп ауыстырды. Механикалық мойынтіректерді жөндеймін. Жұмыс маңызды әрі өзіме ұнайды. Осы кәсіпорында 16 жылдан бері жұмыс істеймін.

Біраз уақыттан кейін сахнаға жаңа JAC автокөлігі шығарылды. Бұл да зауыт қызметкерлеріне арналған кезекті тосынсый болды. ERG Service бас директоры Сергей Перепечин көліктің кілтін құйма-механикалық цехының қызметкері Гүлнар Матаеваға, өндірістік цехтың электргазбен дәнекерлеушісі Николай Науменкоға, Павлодар жөндеу басқармасының жабдықтарды жөндеу слесарі Әділбек Молдабековке, Ремонттық-механикалық метал өнімдері зауытының жөндеу слесарі Сергей Кольчиковке және Рудный жөндеу басқармасының жылжымалы құрамды жөндеу цехының шебері Әкімзада Ахметовке табыстады.

ERG Service кәсіпорындарының қызметкерлерінің үштен бірі – жастар. Еуразиялық топтың кадрлар және мәдениет жөніндегі басқарма төрағасының орынбасары Анастасия Круч топтың барлық компанияларының ішінде өндірісте қалған студенттердің ең көп саны – 85 пайызы – Павлодарда екенін атап өтті.

– Бұл кәсіпорынның ұзақ өмір сүретінін, дамитынын және жаңа биіктерге жететінін білдіреді, – деді Анастасия Круч. – Мұның бәрі тәлімгерлердің, кәсіпорынның іргесін қалағандардың және бүгінде өндірісте еңбек етіп жүргендердің арқасында.

Мерекеге Қарағанды, Балқаш, Жезқазған қалаларынан үлкен серіктестер делегациясы келді.

– Біздің бәрімізді біріктіретіні – шамамен 20 жыл бойы ERG-де еңбек еткеніміз және бұл одақты өз үйіміздей көретініміз, – деді «Kazakhmys Smelting» бас директоры Жанібек Байғабелов. – Мұнда біз көп жылдан бері бірге үлкен іс жасап жүрген әріптестерімізді кездестірдік. Сол істің әлі де жалғасып жатқанына қуаныштымын.

Қонақтар жақсы байланыстардың белгісі ретінде сервистік компания жөндеушілеріне 30 рация сыйға тартты.

Марапатталғандардың арасында көпірлі кран машинисі Анар Иксатова да бар. Ол Павлодар машина жасау зауытында 18 жылдан бері еңбек етеді. Бұл оның еңбек жолындағы екінші жұмыс орны.

– Бұл жерге келгенімде мені жақсы қарсы алды, ұжым өте ұйымшыл, – дейді Анар. – Әр кезекшілікте крандарымызды ауыстырамыз, жұмыстың ерекшелігі солай. Көпірлі крандар биік емес, шамамен алты-жеті метр. Мен кранмен біртұтаспын дей аламын, оның тынысын, әр бөлшегінің жұмысын сеземін.

ERG Service-тегі еңбек өтілі Бауыржан Нұрышовта аздау, бірақ ол да өз жұмысына сондай жауапкершілікпен қарайды.

– Біздің міндет – крандарды тасымалдауға арналған поддондар, жәшіктер мен арқалықтарды сызбаларға сәйкес дайындау, – дейді Бауыржан. – Барлығы дәл орындалуы тиіс, үнемі техникалық бақылау жүргізіледі.

ERG Service қызметкерлері тек өндірісте ғана емес, шығармашылықта да өздерін көрсете білді. Бұл жерде талантты адамдар көп. Олар Мәдениет сарайының үлкен сахнасында өз өнерлерін паш етті. Олардың ішінде Рудный қаласынан келген электргазбен дәнекерлеуші Олжас Нұржауов бар. Павлодардан Дильнара Жамболатова тамаша ән шырқады, ал Александра Гнедаш барабанда ойнады. Көрермендер оларға керемет қолдау көрсетті. Сапа бөлімінің техникалық бақылау және сынақ зертханасының инженері Ринат Левинский туралы айтпай кетуге болмайды. Кешкісін ол талантты диджейге айналып, жиналған қауымға би билетті.

ERG Service, мысалы, Робот дәнекерлеуші сияқты ақылды машиналарды ғана жасамайды. Сахнада керемет би тобына «басшылық еткен» робот-дирижер да ерекше әсер қалдырды.

Зауыт қызметкерлеріне арналған кезекті тосынсый – Kalifarniya мен Дильназ Ахмадиеваның өнер көрсетуі болды. Қазақстан эстрадасының танымал жұлдыздары ERG Service ұжымына мерейтойға орай өздерінің ең үздік әндерін арнады.

– Мұндай мерекелерді өткізу керек, қызметкерлерімізді құрметтеуіміз қажет, – деп түйіндеді Сергей Перепечин. – Бастысы – залда жылы, қуанышты атмосфера орнады. Коллектив керемет әсермен тарқасты.

Бас директор әр мерекенің сервистік компанияда ерекше көңіл-күймен өтетінін атап өтті. Себебі он жыл ішінде кәсіпорында осы үлкен жолдың мәнін түсінетін кәсіби команда қалыптасты.

Серіктестік материал