Тамыз айында үш белгілі тұлғаға арналған іс-шаралар ұйымдастырылады, деп хабарлайды  @Pavlodarnews.kz тілшісі.

Өңірлік коммуникациялар қызметінде өткен баспасөз конференциясында облыстық мәдениет, тілдерді дамыту және архив ісі басқармасының басшысы Медет Тауасқан жыл басынан бері мерейтой иелеріне арналған 1700-ге жуық іс-шара ұйымдастырылғанын атап өтті. 

3 тамыз күні Ақтоғай ауданы Ақтоғай ауылының «Тәуелсіздік саябағында» көрнекті ақын, өлкетанушы, қазақ өнерінің жанашыры, жыршы, сазгер, Ұлы Отан соғысының ардагері Қимадиден Нығмановтың 100 жылдығына арналған мерейтой өтеді.

Мерейтойға орай шағын киіз үйлер тігілетін болады. Сонымен қатар, оның «Атырау» атты кітабының тұсаукесері өтетін болады. Оған қоса, ұлттық спорт түрлерінен жарыстар өткізіліп, облыстық ақындардың айтысы ұйымдастырылады.

10 тамыз күні Аққулы ауылында Абай күніне орай Рүстембек Омаровтың 105 жылдығына және ауданның 85 жылдығына арналған мерейтой ұйымдастырылады. 

– Іс-шара Аққулы ауылында орнатылған Абай бюстіне гүл шоқтарын қою рәсімінен бастау алады. Аққулы ауылының орталығында 10-ға жуық киіз үй тігілген этноауыл орнатылады. Сонымен қатар,  композиторға және ауданның  85 жылдығына арналған көрме орнатылады. Сонымен қатар, этноауыл алаңында қолөнершілер жәрмеңкесі өткізіледі деп жоспарлануда, – деді Медет Тауасқан.

Ал, 24 тамыз күні балалар жазушысы, журналист, өлкетанушы Мүбәрак Жаманбалиновтің 100 жылдығы орай Ертіс ауданының Ертіс ауылында іс-шаралар ұйымдастырылады. 

Күрделі жөндеуден өткен өнер мектебіне М. Жаманбалиновтың есімін беру рәсімі, аудандық мәдениет үйінде М. Жаманбалиновтың жеке қорынан көрме қойылады. Сондай-ақ, сол жерде республикалық оқырмандар конференциясы ұйымдастырылып, ауданның, облыстың өнерпаздарымен концерт өтеді.  Оған қоса, «Өсиет» атты кітабының тұсаукесері болады. 

Еске сала кетейік, геолог-ғалым, академик Қаныш Сәтбаевтың 125 жылдық мерейтойына арналған салтанатты іс-шаралар 16-17 тамыз күндері өтеді. Баянауылда өтетін іс-шарада арнайы шақырылған эстрада жұлдызы ән шырқайды және 100-ден аста киіз үй тігіледі.