Олар кейс-әдіс арқылы оқытылады, деп хабарлайды @Pavlodarnews.kz тілшісі.

23 тамызда сайлау учаскелерінде жұмыс істейтін комиссия мүшелеріне арналған оқыту семинарлары басталды. Оқыту Құрылтай депутаттарын сайлау күніне дейін жалғасады. Семинардан кейін мамандар электронды тестілеуден өтуі тиіс.

Бұл ретте тестілеуден төмен нәтиже көрсету комиссия құрамындағы жұмыстан автоматты түрде шеттетілуге негіз болмайды.

– Егер тест нәтижесі белгіленген ұпайдан төмен болса, ол адаммен жеке жұмыс жүргіземіз, қосымша дайындықтан өткізіп, нәтижесін қайта қараймыз, – деп түсіндірді Орталық сайлау комиссиясының өкілі Михаил Бортник.

Тестілеуден өте алмаған комиссия мүшелеріне арнайы практикалық кейстер мен қосымша оқу материалдары ұсынылады. Оқыту тек заңнаманы зерделеумен шектелмейді.

– Комиссия мүшелеріне дауыс беру күні туындауы мүмкін түрлі практикалық жағдайларды талдау ұсынылады. Мысалы, сайлаушы жеке куәлігін ұмытып кеткен жағдайда не істеу керек, үйде дауыс беруді қалай ұйымдастыру қажет, мүгедектігі бар адамдармен қалай жұмыс істеу керек, сондай-ақ бұқаралық ақпарат құралдарының өкілдерімен және байқаушылармен қалай өзара әрекеттесу керек деген мәселелер қарастырылады, – деді ОСК өкілі.

Оның айтуынша, негізгі мақсат – комиссия мүшелерінің сайлаушылармен жұмыс істеуге дайын, әдепті, сауатты әрі құзыретті болуын қамтамасыз ету.

Михаил Бортниктің сөзінше, сайлау комиссиялары мүшелерінің едәуір бөлігі бұл жұмыста тәжірибесі бар мамандар. Олардың көпшілігі жақында өткен референдумға да қатысты.

Комиссия мүшелерін даярлау сайлау күніне дейін жалғасады. Әрбір аумақтық сайлау комиссиясы учаскелік комиссия мүшелерімен жұмыс істеудің жеке кестесін әзірлеген. Қажет болған жағдайда қосымша оқу сабақтары өткізіледі.

ОСК өкілінің айтуынша, мұндай оқыту жүйесі дауыс беру күні сайлау комиссияларының жұмысын сауатты әрі ұйымдасқан түрде жүргізуге мүмкіндік береді.