Өтініштердің өсуі нарықтағы жағдайдың нашарлауымен емес, халықтың хабардарлығының артуымен түсіндіріледі, деп хабарлайды @Pavlodarnews.kz тілшісі.

Павлодар облысы бойынша сауда және тұтынушылардың құқықтарын қорғау департаментімен 2025 жылдың төрт айында 570 өтініш қаралды. Бұл өткен жылдың сәйкес кезеңімен салыстырғанда 42-ге көп. 

Көбінесе өңір тұрғындары бөлшек сауда, тұрмыстық қызмет көрсету және интернет-дүкендер саласындағы бұзушылықтарға шағымданған. 

– Тексеру барысында департамент мамандары тауардың мәлімделген сипаттамаларға сәйкестігін, жеткізудің кешігуін, ақшалай қаражатты қайтарудан бас тартуды және қосымша қызметтерді жүктеуді анықтады. Өтініштерді қарау нәтижелері бойынша төрт айда 59 миллион теңгеден астам ақша қаражаты қайтарылды, – деді Павлодар облысы сауда және тұтынушылардың құқықтарын қорғау департаментінің басшысы Дәулен Қабдушев.

Өтініштерді қабылдаудан басқа, департамент қадағалау қызметін күшейтті. Қаңтардан сәуірге дейін 121 тексеру жүргізілді, 76 жағдайда сауда туралы заңнаманың бұзылуы анықталды. Әлеуметтік маңызы бар азық-түлік тауарларына белгіленген 15 пайыздық сауда үстемесін сақтауға ерекше назар аударылды. Алайда, тексерулер көрсеткендей, жекелеген нарықтарда ол бірнеше есе асып түседі. Сонымен, картоптың үстемесі 106 пайызға, сәбізге – 75, қарақұмыққа – 52,5 пайызға жетті.

–  Осы жылдың 13 наурызында әкімшілік құқық бұзушылық туралы Кодекске өзгерістер енгізілді. Егер бұрын кәсіпкерлерге әлеуметтік маңызы бар азық-түлік тауарларына сауда үстемесін асырғаны үшін алдымен ескерту жасалса, енді бірден айыппұл тағайындалады. Оның мөлшері бизнес санатына байланысты және 5-150 айлық есептік көрсеткішті құрайды, – деді Дәулен Қабдушев.

Төрт айдың ішінде аймақтағы 12 кәсіпкерге үстеме бағадан асып кеткені үшін айыппұл салынды. Департамент бұл бағыттағы жұмыс жалғасатынын атап өтті.