Білім басқармасы өкілдері мұғалімдерді қолдау мен оқушылар жетістіктері арасында тікелей байланыс барын атап өтті, деп хабарлайды @Pavlodarnews.kz

2020 жылы «Педагог мәртебесі туралы» заң қабылданғаннан кейін Павлодар облысы ұстаздарды медальдармен және ақшалай сыйақылармен марапаттау жүйесін алғашқылардың бірі болып енгізді. Білім басқармасы басшысының орынбасары Гүлмира Башированың айтуынша, мұғалімдерге берілетін марапат көлемі – 1000 АЕК, бұл 2025 жылы шамамен 2,6 миллион теңгені құрайды. Соңғы бес жылда осындай марапатқа 100-ден астам педагог ие болған.

Чемпиондарды тәрбиелейтін өндірістік оқыту шеберлері де назардан тыс қалмады. Мұғалімдер күніне арналған салтанатты жиында 11 шебер Құрмет грамоталарымен және алғыс хаттармен марапатталды.

– WorldSkills қатысушыларымен жұмыс істейтін педагогтарды қолдау біз үшін аса маңызды. Бұл қозғалыс – дарынды жастардың нағыз ұстаханасы, – деді Гүлмира Баширова.

Педагогтардың жоғары кәсіби жұмысы оқушылар жетістіктерімен дәлелденіп отыр. Өткен оқу жылында Павлодар облысынан 50 оқушы беделді халықаралық олимпиадалардың жүлдегері атанды. Солардың бірі – «БІЛІМ-ИННОВАЦИЯ» лицейінің оқушысы Ерсұлтан Қайыркен. Ол Филиппинде өткен халықаралық биология олимпиадасында қола медаль жеңіп алды. Тамыз айында Ерсұлтан Ақордада Мемлекет басшысымен кездесуге шақырылып, 500 АЕК (1,9 миллион теңге) көлемінде сертификатқа ие болды.

– Біз педагогтарымыз бен оқушыларымыздың арқасында Павлодар облысының аты тек Қазақстанда ғана емес, әлемдік деңгейде де танылып жатқанына мақтанамыз, – деп қосты басқарма басшысының орынбасары.

Педагогтарды қолдаумен қатар, облыста мектеп инфрақұрылымын жақсарту жалғасуда. Соңғы екі жылда апатты мектептердің орнына ауылдарда жаңа мектептер салынуда. 2026 жылы Екібастұз қаласына қарасты Атығай ауылында 150 орындық және Ертіс ауданының Қызылқақ ауылында 120 орындық жаңа мектептер ашу жоспарланған.

– Павлодар қаласындағы Усолка шағын ауданында жаңа мектеп салу үш ауысымды оқыту мәселесін шешуге мүмкіндік береді, – деді Гүлмира Баширова.

Айта кетейік, жаңа оқу жылының басында Павлодардың Достық шағын ауданында №48 мектеп ашылып, оның жағдайын еліміздің Оқу-ағарту министрі жұмыс сапары барысында жоғары бағалады.