Биыл қыркүйек айының соңында елімізде әуе жолаушылар көлігі қызметі бір жылда 6,8% қымбаттады, деп хабарлайды @Pavlodarnews.kz тілшісі.

Finprom.kz сарапшыларының мәліметінше, өңірлер бойынша баға Атырау облысында 49,2% өскен. Одан кейін Батыс Қазақстан (43,6%) және Қызылорда (24,6%) облыстары тұр. Бағаның ең аз жылдық өсімі Алматы қаласында тіркелді: 0,8%.

– Еліміздің 20 өңірінің алтауында әуе билеті арзандаған. Бағаның ең көп төмендеуі Жамбыл облысында – 28% тіркелді. Үздік үштікте Түркістан (23,9%) және Павлодар (11,8%) облыстары тұр, – деп жазылған хабарламада. 

Әуе көлігі саласындағы негізгі капиталға салынған инвестиция бес есеге жуық өсті. Әуе жолаушылар көлігі қызметі бір жылда 7% қымбаттады. Биыл қаңтар-қыркүйекте әуе көлігі саласының негізгі капиталына салынған инвестиция 47,6 млрд теңгені құрады, бұл – былтырғыдан 4,8 есе артық.

Ең жоғары көрсеткіштер Шымкентте тіркелді: бір жыл бұрынғы 3,5 млрд теңгемен салыстырғанда 31 млрд теңге. Одан кейін Алматы (11,2 млрд теңге), Астана (5,4 млрд теңге) және Алматы облысы (26,9 млн теңге).

Биыл салаға салынған инвестиция еліміздің тек төрт өңірінде, былтыр сәйкес кезеңде үш өңірде тіркелді. Биыл қаңтар-қыркүйектің соңында әуе компаниялары 9,9 млн адамды тасымалдады, бұл – былтырғыдан 24,9% көп. Ең жоғары көрсеткіш Алматыда тіркелді: 3,4 млн адам, бір жылда 27% көбейген. Одан кейін Астана (2,6 млн адам) мен Шымкент (922,7 мың адам).

Жолаушылар айналымы 19,5 млрд жкм құрады, бұл – былтырғы сәйкес кезеңмен салыстырғанда 35,9% артық.

Биыл қаңтар-қыркүйекте әуе көлігімен тасымалданған жүк пен багаждың көлемі 17,2 мың тоннаны құрады, бұл – былтырғыдан 0,3% аз. Соның ішінде Алматыға – 10,2 мың тонна, Шымкентке – 4,5 мың тонна, Астанаға  2,6 мың тонна болды.

Қаңтар-қыркүйекте жүк айналымы 37,7 млн ткм құрады, бұл – өткен жылмен салыстырғанда 3,2% аз.