ERG Service компаниясында кәсіби шеберлік байқаулары жыл сайын өткізіледі. Үздік мамандар біліктілігін арттыруға мүмкіндік алады, деп хабарлайды @Pavlodarnews.kz тілшісі.

Павлодар машина жасау зауытында кран машинистері мен стропальщиктер арасында «Кәсібі бойынша үздік» кәсіби шеберлік байқауы өтті. ПМЗ-да жыл сайын ұйымдастырылатын бұл жарыс Машина жасаушы күніне орайластырылған және қызметкерлердің білімін ғана емес, олардың нақты кәсіби шеберлігін де тексеруге мүмкіндік береді.

Байқауға кемінде бір жыл еңбек өтілі бар және тәртіптік жазасы жоқ кран машинистері қатыса алады. Бұл жолы да дәлдік, ұстамдылық пен жауапкершілік күнделікті жұмысының ажырамас бөлігі болып табылатын мамандар бас қосты.

Алдымен олар теория бойынша білімдерін тексеруден өтеді, содан кейін практикалық дағдыларын көрсетеді. Кран машинистері үшін бұл кезең әсіресе қызықты: маманның жүк көтергіш механизмді қаншалықты жақсы меңгергенін және оны қаншалықты сезіне алатынын көрсетуі қажет, — деді ERG Service еңбек және өнеркәсіптік қауіпсіздік жөніндегі директоры Александр Яковлев.

Байқау тестілеуден басталды. Қатысушыларға мамандыққа, еңбекті қорғау және өнеркәсіптік қауіпсіздікке қатысты сұрақтарға жауап беру қажет болды. Мұнда жауаптың дұрыстығымен қатар қателер саны да маңызды болды: дұрыс жауап үшін ұпай берілсе, қате жауап үшін айып ұпайы шегерілді.

Практикалық кезеңге қатысушылар мұндай жарыста ұсақ-түйек болмайтынын түсініп кірісті. Одан әрі тапсырманы орындау жылдамдығы, жұмыстың сапасы және барлық қауіпсіздік талаптарының сақталуы ескерілді.

Байқаудың алғашқы жұбын электр дәнекерлеуші әрі стропальщик Дәурен Смағұлов пен ПМЗ кран машинисі Вероника Беннер құрады. Олар байқаудың күміс жүлдегерлері атанды. Дәурен теориялық кезеңге байыппен дайындалғанын айтады.

— Мен теорияның бәрін егжей-тегжейлі оқып шықтым. Ал практикада қалай болатынын осында көреміз. Әрине, негізгі сынақ кран машинистері үшін. Бірақ мен де жұптасқан әріптесімнің жақсы өнер көрсетуі үшін барымды саламын, — дейді ол.

Вероника Беннер үшін бұл байқау осындай форматтағы алғашқы тәжірибе болды. Зауытта жұмыс істеп жүргеніне бір жарым жылдай уақыт болған. Кран машинисі мамандығын саналы түрде таңдағанын және өз жұмысы өзіне ұнайтынын айтады. Практикалық кезең алдында бойжеткеннің қобалжып тұрғаны байқалды. Дегенмен сынаққа мұқият дайындалғанын — теорияны оқып, барлық жайттарды ескеруге тырысқанын айтты.

— Мен мұндай байқауға алғаш рет қатысып отырмын. Өз күшімді сынап, жаңа тәжірибе жинақтап көру қызықты болды. Әрине, аздап қобалжып тұрмын, — деді Вероника Беннер.

Кран машинистері үшін практикалық бөлім дәлдік пен ұстамдылыққа арналған негізгі сынақ болды. Қатысушыларға салмағы бір тоннадан екі тоннаға дейінгі жүкті көпірлі кранның көмегімен арнайы дайындалған лабиринт арқылы жылжыту керек болды. Диагональды учаскеден өтіп, кедергілерді айналып, бөшкелердің арасындағы «жыланша» жолдан өту, соңында жүкті абайлап қораптың үстіне түсіріп, оны жабу және жүкті есептік шеңберге орналастыру қажет болды.

Бұл ретте кран шектеу тіректеріне, керілген таспаларға және басқа да кедергілерге тимей, белгіленген бағытпен өтуі тиіс болды. Кедергіге тиген жағдайда айып ұпайлары берілді, ал лабиринттің бұзылуына әкелуі мүмкін тіректі құлатып алу — жарыстан шеттетуге себеп болды.

Финалдық операциялардың дәлдігі де жеке бағаланды. Қорапты дұрыс жабу үшін қосымша ұпай берілді, ал оның майысуы, жүкті есептік аймақтан тыс орналастыру және басқа да қателер айып ұпайларына әкелді. Әр машиниске екі мүмкіндік берілді: біріншісі — сынақ, екіншісі — есептік нәтиже үшін. Қорытындыда ең үздік нәтиже есепке алынды.

— Бұл адам рөлді жай ғана бұратын машина емес. Машинист көпірді де, арбаны да басқарады, сонымен бірге жүктің орналасуын бақылауы керек. «Жыланша» жолдан, диагональдан, лабиринттен өтіп, сонымен қатар еңбекті қорғау және өнеркәсіптік қауіпсіздік талаптарының бұзылуына жол бермеуі қажет, — деп атап өтті Александр Яковлев.

Стропальщиктер үшін де сынақ жауапкершілігі жағынан кем түскен жоқ. Оларға алынбалы жүк қармау құралдарын дұрыс таңдап, жүктің стропталуын схемаға сәйкес орындау қажет болды. Құрылғыны дұрыс таңдамау немесе жүктің дұрыс стропталмауы да айып ұпайларына әкелді.

Дәл осы жерде кран машинисі мен стропальщик жұмысының командалық жұмыс екені айқын көрінеді. Бірі механизмді басқарады, екіншісі жүкті дұрыс дайындау мен строптауға, командалар беруге және операциялардың қауіпсіздігіне жауап береді. Бір адамның қателігі бүкіл команданың нәтижесіне әсер етуі мүмкін.

Жарыс кезіндегі бәсекелестік рухқа қарамастан, қатысушылардың басты мақсат тек қарсыласынан қашықтықты жылдам өту емес екенін түсінді. Нақты жұмыс жағдайында қателіктің бағасы бірнеше айып ұпайынан әлдеқайда жоғары.

Сондықтан байқау комиссиясының мүшелері әр кезеңді — теориялық сұрақтарға жауап беруден бастап практикалық операцияларды орындауға дейін — мұқият бақылап отырды. Еңбекті қорғау және өнеркәсіптік қауіпсіздік талаптарының бұзылуы қосымша айып ұпайлары ретінде есепке алынды.

Жеңімпаз барлық айыптарды ескере отырып, жинаған ұпайларының жалпы саны бойынша анықталды. Яғни бірінші орынға жүкті бәрінен жылдам жылжытқан адам емес, дәл, мұқият әрі қауіпсіз жұмыс істей алатын нағыз кәсіби маман лайық болды.

ERG Service таланттарды дамыту жөніндегі менеджері Юлия Апряткинаның айтуынша, жеңімпаз үшін байқаудың маңызы тек марапатталумен шектелмейді. Мұндай жарыстарға қатысу мамандарға өз дағдыларын жетілдіруге, ал үздік кран машинисіне кәсіби біліктілігін арттыруға мүмкіндік береді.

Біз үшін мұндай байқаулар, ең алдымен, қызметкерлеріміздің кәсіби әлеуетін көруге және дамуға ұмтылатын мамандарды қолдауға мүмкіндік береді. Әр маманның өсуіне, дағдыларын жетілдіруіне және одан әрі кәсіби дамуына мүмкіндік болғанына мүдделіміз, — деді ERG Service персонал және корпоративтік мәдениет жөніндегі директоры Шыңғыс Дусалаков.

Дегенмен байқаудың өзі-ақ Павлодар машина жасау зауыты қызметкерлері үшін бұл жай ғана үздік атағы үшін өтетін жарыс емес екенін көрсетті. Бұл — өзіңді сынап көруге, әріптестеріңнің кәсіби деңгейін бағалауға және машина жасаудағы кәсібилік білімнен, тәжірибеден, ұстамдылықтан және қозғалыстың әр миллиметрі үшін жауап бере білуден қалыптасатынына тағы бір рет көз жеткізуге мүмкіндік.

Сірә, дәл сондықтан ERG Service компаниясында бұл күні қарапайым қағида ерекше айқын естілді: үлкен механизмде кішкентай жауапкершілік болмайды.

Жарнамалық материал