Шаһарда өрт-тактикалық оқу-жаттығулар өтті, деп хабарлайды @Pavlodarnews.kz тілшісі.

Павлодар қаласының сараптама орталығында төтенше жағдайлар департаментінің қызметкерлері ұйымдастырған оқу-жаттығу жоспары бойынша қызметкерлер төтенше жағдайдың алдын алды: зертханашылардың жұмысы барысында химиялық реакция орын алып, өрттің үй-жайға одан әрі таралуына себеп болды.

– Іс-шараның басты мақсаты ықтимал қауіпті химиялық заттары бар объектілердегі төтенше жағдайларды жоюға мамандардың дайындығын арттыру болды. Оқу-жаттығуға ТЖД жеке құрамының 36 қызметкері және жеті мамандандырылған техника жұмылдырылды. Өрт сөндірушілер өртті сөндіру, қызметкерлерді эвакуациялау және төтенше жағдайдың салдарын жою кезінде өзара іс-қимыл алгоритмдерін пысықтады, – деді департаментте. 

Бөлімшелер арасындағы үйлестіруге, жағдайды жедел бағалауға және қауіп-қатерге тез жауап беруге ерекше назар аударылды. Оқу-жаттығулар жеке құрамның дайындық деңгейін және қолда бар техниканың тиімділігін бағалауға мүмкіндік берді.

ТЖД өкілдері аталмыш жаттығулар өрт сөндірушілердің кәсіби дағдыларын жақсартуға ғана емес, сонымен қатар олардың қауіпсіздікті қамтамасыз етуге дайын екендігіне қоғамның сенімін нығайтуға көмектесетінін атап өтті.