Егер жаңбыр жаумаса, жөндеу жоспар бойынша жүргізіледі, деп хабарлайды @Pavlodarnews.kz тілшісі.

26 шілде күні таңғы сағат 07:00-ден бастап 27 шілде кешкі сағат 20:00-ге дейін Абай, Бекмахан, Толстой көшелерінде көлік қозғалысына уақытша шектеу қойылады. Сондай-ақ, 26 шілде күні Абай және Естай көшелерінің қиылысы уақытша жабылады.

Тұрғын үй-коммуналдық шаруашылығы бөлімінің мәліметінше, бұл шектеулер жөндеу жұмыстарына байланысты және тек жауын-шашын болмаған жағдайда ғана жүзеге асады.

Жүргізушілерге жол жүру бағытын алдын ала жоспарлауға кеңес беріледі, бұл кептелістер мен кідірістерден сақтайды.

Айта кетейік, биыл Павлодарда 15 көшеге жөндеу жұмыстары жүргізіліп жатыр. Жол жөндеуге 6,8 миллиард теңге бөлінген.

Жөндеу маусымының ерекшелігі – жаңа технологиямен төселетін жіксіз асфальт. Бұл +40-тан -40 градусқа дейінгі күрт ауа райы өзгерістеріне бейімделген жамылғы. Ол ұзақ уақытқа шыдайды, жарықтар аз түседі және тозуы төмен.

Сондай-ақ, кейбір учаскелерде асфальт төсемес бұрын тозған су құбырлары ауыстырылып жатыр. Бұл инфрақұрылым сапасы мен ұзақ мерзімділігін арттыруға мүмкіндік береді.

Сонымен қатар, Лермонтов көшесінің ауқымды қайта жаңғырту жұмыстары жалғасуда. Жоба аясында он ойын және спорт алаңы, сондай-ақ көше бойына заманауи велоинфрақұрылым салу жоспарланған.

Барлық жұмыстар қаланың көлік қатынасын жақсартуға, қауіпсіздік пен жайлылықты арттыруға бағытталған.