Балалар теміржол көлігімен байланысты мамандықтармен, байланыс және электроника салаларымен танысып, өз білімдерін шыңдады, деп хабарлайды @Pavlodarnews.kz тілшісі.

Жоғары электроника және коммуникация колледжінде WorldSkills Павлодар 2025 өңірлік кәсіби шеберлік байқауы аясында Baby Skills 2025 «Жас қозғалысшы» бағыты бойынша іс-шара өтті.

– Бұл байқау балалардың теміржол саласына деген қызығушылығын арттырып, технологияларды зерттеуге, тапқырлық пен командалық рухты дамытуға бағытталды. Жарысқа 2-4-сынып оқушылары қатысып, теміржол мамандықтары мен байланыс технологияларының қызықты әлеміне ену мүмкіндігіне ие болды, – деді ұйымдастырушылар.

Байқау квест-ойын форматында өтті, онда қатысушылар өз білімдерін, тапқырлығын, зейінділігін және командалық жұмыс дағдыларын көрсетті. Олар бірнеше қызықты және түрлі модульдерден өтіп, өз қабілеттерін жан-жақты сынады.

Байқау қорытындысы бойынша бірінші орынды «Train Brain», екінші орынды «Огоньки» командасы иеленді. Үшінші орынды «Лучики» және «Цифрлы пойыз» командалары өзара бөлісіп алды. 

Ұйымдастырушылардың айтуынша, бұл байқау жас «қозғалысшылар» үшін үлкен сынақ қана емес, сонымен қатар олардың болашақ мамандығын таңдауға көмектесетін тамаша мүмкіндікке айналды.