Қуаты 80 мегаватт болатын жаңа қосалқы станция қаланың оңтүстік және оңтүстік-шығыс бөліктеріндегі электрмен жабдықтау сенімділігін едәуір арттыруы тиіс, деп хабарлайды @Pavlodarnews.kz тілшісі.

Павлодар облысының әкімі Асайын Байхановқа ТҮКШ бөлімінің «Коммунсервис» мекемесінің басшысы Закария Сұлтанғазиновтың айтуынша, 2018 жылдан бері бұл қосалқы станция аяқталмай қалған проблемалық нысан болған. Осы уақыт ішінде жабдықтардың бір бөлігі жарамсыз күйге түсіп, инфрақұрылымның кей бөлігі тоналған. Нысан энергетиктердің қарамағына берілгеннен кейін станцияда толық тексеру жүргізіліп, ағымдағы жөндеу жасалды, зақымданған жабдықтар ауыстырылып, желілер қалпына келтіріліп, нысан іске қосылды.

– Қосымша 170 киловольттық екі желі тартылды. Бүгінде станция толықтай жұмыс істеп тұр, – деді спикер. – Ол 50 мың абонентті қамтиды. Бұл – қаланың төрттен бірі.

Қосалқы станцияның әрқайсысының қуаты 40 мегаватт болатын екі трансформаторы бар. Салыстыру үшін айтсақ, Екібастұз шамамен 30 мегаватт электр энергиясын тұтынады. Демек, жаңа станцияның қуат қоры Екібастұз секілді екі жарым қаланың энергия тұтынуымен шамалас.

Сонымен қатар, нысанды іске қосу проблемалық желі учаскелерін кезең-кезеңімен жаңа қосалқы станцияға қосуға және қаланың жекелеген аудандарындағы апаттық электр өшірулерінің санын азайтуға мүмкіндік береді.