№1 ОРМБЖСМ-де болашақ спортшылардан басқа, танымал шеберлер де өнер көрсетті, деп хабарлайды @Pavlodarnews.kz тілшісі.

Павлодар қаласындағы №1 ОРМБЖСМ базасында спорттық акробатикадан жарқын жарыс өтті. Бұл шараға жас спортшылар, олардың ата-аналары және спорт жанкүйерлері жиналды. Кілем үстінде кіші топтар да, тәжірибелі акробаттар да өнер көрсетіп, көрермендерге әсерлі бағдарламаларын ұсынды.

Көрермендердің ерекше ықыласына Қазақстан Республикасы, Азия және әлем чемпионаттарының жүлдегерлері болған шебер спортшылардың көрсетілімдері ие болды. Олардың шеберлігі, күрделі элементтері мен үйлесімді қимылдары залдағы көпшілікті тәнті етіп, ұзақ қол шапалаққа ие болды.

Жарыс қорытындысы бойынша қыздар жұбы арасында бірінші орынды Любовь Головчук пен Дана Ғалымбек жеңіп алды. Олар жоғары дайындық деңгейін және тамаша техниканы көрсетті.

Өз әсерімен сегіз жасар Дана Ғалымбек бөлісті.

— Мен акробатикамен бір жарым жылдан бері айналысамын. Маған өте ұнайды — бұл қызықты әрі әдемі спорт. Сахнада өнер көрсеткенді жақсы көремін, алдағы уақытта бұдан да мықты болғым келеді, - дейді ол.

Қатысушылардың ата-аналары жарыстың жоғары деңгейде ұйымдастырылғанын атап өтіп, жаттықтырушыларға кәсібилігі, еңбегі және балаларды дамытуға қосқан үлесі үшін алғыс білдірді.

Аталған жарыс нағыз спорт мерекесіне айналып, жас акробаттарға жаңа жетістіктерге жетуге үлкен шабыт сыйлады.