Шара барысында қаламгердің өмір жолы, шығармашылық мұрасы және қоғамдық қызметі кеңінен еске алынды, деп хабарлайды @Pavlodarnews.kz тілшісі.

Бұқар жырау атындағы әдебиет және өнер музейінде өлкетанушы Бикбулат Хазыровтың 100 жылдығына арналған «Шежіре сөздің шебері» атты еске алу кеші ұйымдастырылды. 

Бикбулат Хазыров Тюмень облысында дүниеге келген. 10-сыныпта оқып жүргенде тікелей 17 жасында әскер қатарына шақырылған. Оның әскери қызметі бес жылдан астам уақытқа созылып, 1944 жылдың ақпанынан 1949 жылдың шілдесіне дейін жалғасқан. Әскер қатарында жүрген кезінде ол Алматы қаласындағы С.Киров атындағы Ішкі істер министрлігінің шекара училищесін үздік бітірген.

Қаламгердің еңбегі мемлекет тарапынан жоғары бағаланды. Ол КСРО-ның 20 мемлекеттік наградасына ие болды. Олардың қатарында екінші дәрежелі Отан соғысы ордені, «Құрмет белгісі» ордені, «Еңбек айырмашылығы үшін» медальдарының үш мәрте иегері бар. Сонымен қатар Қазақстан Республикасы Жоғарғы Кеңесінің екі Құрмет грамотасымен, партия және атқарушы органдардың бірқатар марапаттарымен, сондай-ақ түрлі ведомстволық белгілермен марапатталған. Бикбулат Маняпұлы Қазақстан Журналистер одағы мен облыстық журналистер ұйымының лауреаты атанып, елімізге сіңірген ерекше еңбегі үшін жеке зейнеткер мәртебесіне ие болған.

Шығармашылық қызметі барысында ол шамамен 20 кітап жазып, жарыққа шығарған. Оның еңбектері тарихи деректерді, соғыс ардагерлері мен еңбек адамдарының тағдырын қамтып, құнды мұра ретінде бағаланады.

Еске алу кешінде сөз алған марқұмның қызы Галина Хазырова әкесінің өмірі мен еңбегі туралы естеліктерімен бөлісті.

–  Мен әкемді өте қатты мақтан тұтамын. 15 шілдеде оның туғанына 100 жыл толар еді. Ол өте белсенді қоғам қайраткері болды. Көптеген маңызды кітаптар жазды. Ол өз еңбектерінде тек өмірді ғана емес, соғысқа қатысқан сарбаздар мен соғыстан кейінгі еңбек адамдарының тағдырын мәңгі қалдырды. Ол өзін әрдайым әскери-пограничник ретінде сезінетін, шекарашылармен соңына дейін байланысын үзбей, оларға көмектесіп отырды. Біз оларға 300 кітаптан тұратын көркем әдебиет қорын сыйға тарттық, – деді ол.

Галина Хазырова әкесінің отбасы үшін де ерекше жан болғанын атап өтті.

–  Әкем үшін отбасы әрқашан бірінші орында болды. Қызметтік сапарларға байланысты біз көп елдерді араладық, ол мені әрдайым өзімен бірге алып жүретін. Біздің демалысымызды да үнемі ойлайтын. Өмірінің соңына дейін, тіпті анамыз қайтыс болғаннан кейін де, мерекелерде гүл сыйлап жүретін. Таңертең тұрсам, гүлдер дайын тұратын. Ол мұны ешқашан ұмытпайтын. Бұл оның ерекше мінезі еді, – деп еске алды ол.

Зейнетке шыққаннан кейін де Бикбулат Хазыров 30 жыл бойы тынымсыз еңбек етіп, бір күн де бос отырған жоқ. Ол зерттеу және жазушылық қызметін жалғастырып, көптеген тарихи еңбектер жазды. Оның еңбегі ауған соғысы ардагерлері мен іздеуші-зерттеушілер тарапынан да жоғары бағаланған.

Сонымен қатар ол «Ақ мешіт» тарихына арналған еңбек те жазған. Биыл Мәскеуден сол мешіттің негізін қалаушылардың ұрпақтары келіп, автордың отбасымен кездесіп, архивтік материалдармен танысқан.

Шара соңында қатысушылар Бикбулат Хазыровтың қазақ әдебиеті мен өлкетану саласына қосқан үлесін ерекше атап өтіп, оның мол мұрасы ұрпаққа өнеге екенін айтты.