Қала әкімі Хасар Хабылбеков қаланы аралау барысында тікелей эфирге шықты, деп хабарлайды @Pavlodarnews.kz тілшісі.

Хасар Хабылбеков Павлодардағы жол жөндеу жұмыстары, әсіресе шұңқырларды жөндеу туралы жан-жақты айтып берді. Себебі дәл осы тақырып бойынша тұрғындардан көп сұрақ түсуде. Ол үдерістің өзін түсіндіріп, қазіргі таңда жол жұмыстарының сапасына қатысты павлодарлықтардан тұрақты түрде өтініштер келіп жатқанын айтты.

– Қаламыздың жолдарын алсақ, мысалы Назарбаев, Сұрағанов, Павлов көшелерінде соңғы жылдары жол жабыны толық жаңартылды, ол жерлерде мәселе жоқ. Сұрағанов көшесінде, сондай-ақ Назарбаев даңғылының жалғасы болып табылатын трамвай басқармасы бағытына апаратын жолда біз қиыршықтас-мастикалық асфальтобетон қолдандық. Ол жерлердің сапасы жақсы. Шұңқырлар жоқ, қозғалыс қауіпсіздігі қамтамасыз етілген, – деді Хасар Хабылбеков тікелей эфирде.

Қала әкімінің айтуынша, жаңа технология жол жабынын әлдеқайда ұзақ пайдалануға мүмкіндік береді. Ал стандартты технологияда бұл мерзім небәрі екі-үш жылды құрайды.

Дегенмен проблемалық учаскелер де бар. Ак.Сәтбаев, Ак. Шөкин, Катаев, Естай және Бұқар жырау көшелерінде жол жабыны кей жерлерде бүлінген. Бұл көшелерде биыл орташа жөндеу жұмыстарын жүргізу жоспарланған.

Павлодар әкімі хабарлағандай, қазіргі таңда мердігер ұйымдар анықталған және олар толыққанды жөндеу жұмыстарын бастау үшін қолайлы ауа райын күтіп отыр. Сонымен қатар жөндеу науқаны кезінде қозғалыс қауіпсіздігін қамтамасыз ету басты назарда.

– Қауіпсіз қозғалысты қамтамасыз ету үшін соңғы жылдары біз мынадай тәжірибені қолдана бастадық: мердігерлер негізгі жөндеуге дейін өз қаражаты есебінен шұңқырларды уақытша жабады. Осыған байланысты тұрғындарда неге жөндеу сапасыз көрінеді, неге асфальт дұрыс төселмеген деген сұрақтар туындайды. Бірақ бұл – тек уақытша шара. Оған бюджет қаражаты жұмсалмайды. Сондықтан кейде асфальт кесілмегендей көрінеді. Біз мердігерлерге бұл олардың міндеті екенін – негізгі жұмыстар басталғанға дейін қауіпсіздікті қамтамасыз ету керектігін түсіндіреміз, – деді қала басшысы.

Толыққанды жөндеу жұмыстарын бастау үшін жер құрғап, асфальт қызуы қажет. Мамандар жұмысты сәуірдің соңы – мамырдың басында бастауды жоспарлап отыр. Қажетті материалдар дайын, асфальт-бетон зауыттары іске қосылған.

Хасар Хабылбеков қазіргі таңда облыс орталығында «Таза Қазақстан» экологиялық акциясы белсенді түрде жүргізіліп жатқанын атап өтті. Оның аясында жол белгілерін және көпірлерді жуу, ағаштарды қалыптап кесу, брусчаткаларды қалпына келтіру сияқты кешенді шаралар жүзеге асырылуда.

Қала әкімі тұрғындарға жолда шөгу немесе жөндеуді қажет ететін учаскелер, сондай-ақ еріген суды соруға қатысты мәселелер байқалса, уақтылы әрекет ету үшін әкімдік мамандарына хабарлау қажеттігін ескертті.

Тікелей эфир барысында павлодарлықтар абаттандыруға қатысты сұрақтарын қойды: жолдардың жағдайы, ағаш отырғызу, су сору мәселелері.

Хасар Хабылбековтің айтуынша, биыл 23 магистральды көшеде жөндеу жұмыстары жоспарланған.