Кездесу барысында еңбек құқықтары мен көлік саласының дамуы туралы пікір алмасу өтті, деп хабарлайды @Pavlodarnews.kz тілшісі.

Павлодар қаласындағы №1 автопарк ұжымымен өткен кездесуде елдің болашағы, еңбек құқықтары және институционалдық өзгерістер мәселелері талқыланды. Әңгіме қызметкерлерге жақын тақырыптардан – маршруттар, жұмыс кестесі және жақында желіге шыққан жаңа автобустардан басталды.

Соңғы бір жылда қалалық қоғамдық көлік айтарлықтай жаңарып, автопарк заманауи автобустармен толықты. Бұл тұрғындар үшін жол жүрудің жайлылығын арттырған.

Кездесу барысында Жалпыұлттық коалиция мүшелері жүргізушілер мен техникалық мамандармен әлеуметтік еңбек құқықтарын дамыту мәселелерін талқылады. Спикерлер қалалық инфрақұрылымның жаңаруы мен елдегі институционалдық өзгерістер арасында байланыс бар екенін атап өтті.

– Егер жаңа автобустар қала тұрғындарының жол жүруін ыңғайлы етсе, жаңартылған Конституция еңбек жағдайларын әділ етуі тиіс. Реформалардың мәні – адам өз еңбегінің қадірін сезініп, заңның қолдауын көруінде, – деді Айман Оспанова.

Кездесу ашық форматта өтіп, автопарк қызметкерлері саладағы өзгерістер мен даму перспективалары туралы өз пікірлерін білдірді.